“Тормош, ысынлап та, ҡуласа икән, – тип башланы һүҙен туҡталышта бер осрашҡанда Мәҙинә. – Әгәр мөмкин булһа, бер нисә йыл элекке тормошомда кире ҡайтарыр инем. Тик бына хәҙер терһәкте бер нисек тә тешләп булмай...” Баҡтиһәң, тормошо бик йәмле һәм йүнле генә күренгән ҡатындың ире ғаиләһенең тарҡалыуын – айырылышыуҙы – һорай икән. “Хәҙер иремдең мине хатта күргеһе лә килмәй. Быға бит мин үҙем ғәйепле. Икенсе ҡатын артынан эйәреп киткән беренсе иремә үс итеп, Наилемде ысын мәғәнәһендә ыҙалаттым: һәр кемдән көнләштем, көн дә уның менән һүҙгә килештем, әрләштем... Ә ул бит мине ысын мәғәнәһендә үлеп ярта ине. Күрәһең, алама холоҡ, һалҡынлыҡ менән хатта көслө мөхәббәтте лә юҡ итеп була икән...” Мәҙинәнең һөйләүенсә, беренсе ирен ул шул тиклем яратҡан, хатта йәберләтеп ҡуймайым тип, уға артыҡ һүҙ әйтергә ҡурҡҡан. Әммә ғаилә карабы ярға килеп туҡтап, селпәрәмә килгәс, икенсе тапҡыр иргә сыҡҡас, ул үҙенә: “Башҡаса бер кем дә минең менән былай ҡыланмаясаҡ”, – тип һүҙ биргән һәм... йәнә яңылышҡан. “Күпмелер ваҡыт үткәс тормош иптәшемде ярата икәнлегемде аңланым. Улыбыҙ тыуғас, тормошобоҙ ипкә килгәйне лә бит. Ипотека һәм кредитҡа сумып, аҡса менән бәйле проблемалар килеп сыҡҡас, ғаиләбеҙҙә тауыш тағы күтәрелә башланы. Был юлы иһә ирем минең элекке йәберләүҙәремде, кәмһетеүемде ҡайтанан хәтеремә төшөрә башланы һәм ғәфү итә алмауы хаҡында әйтте. Ошо саҡта үҙемдең дөрөҫ ҡыланмағанлығымды аңланым, тик бик һуң ине шул...” Өҫтәүенә быйылғы Яңы йылды ҡаршылағанда ҡатындың бер әхирәте Мәҙинәнең элекке ирен үтә яратыуы һәм “уның артынан хатта эт кеүек эйәреп йөрөүе” хаҡында белдергән. Был хәл былай ҙа ауыр ғаилә тормошон йәнә ҡатмарлаштырып ебәргән. “Хәҙер ирем минең бер һүҙемә лә ышанмай. Ә минең уны бер ҙә юғалтаһым килмәй. Элекке хаталарымды төҙәтергә уйлайым да, тик бер нәмә лә килеп сыҡмай,” – ти Мәҙинә... Фото: amp.com