Үләндәр менән дауалаусылар һәр ерҙә бар. Гөлсирә Нәжметдинова Татарстандың Арса районынан. Уға Марий иле, Удмурт Республикаһы, Ульяновск, Киров өлкәләренән шифа эҙләп киләләр. “Йәй һайын мәтрүшкә һәм тағы әллә ни ҡәҙәр шифалы үләндәр йыйып киптереп ҡуям. Балалар сирләп китһә лә, һалҡын тейһә лә, ҡайнатып эсерергә һәр саҡ ҡул аҫтында торһон, тим. Ирем ғүмер буйы тракторҙа эшләне. Бер ваҡыт аяныслы хәлгә осраны. Трактор һәнәгенә эләгеп, ботарланып бөткәйне. Бына шул йылды халыҡ медицинаһына ике ҡуллап йәбешергә тура килде миңә”, - ти Гөлсирә ханым.Башта китаптарҙан уҡып, унан һүрәттәрен ҡарай-ҡарай үләндәр йыя ул. Бер йылдан һуң айыу көпшәһен таба. Һирәк осрай торған ағыулы үләндән төнәтмә яһап, иренә эсерә башлай. Иң беренсе үҙе эсеп ҡарай. Эсәр алдынан паспорты араһына "Был төнәтмәне үҙем эстем. Ул-был була ҡалһа, үҙем генә ғәйепле" тип яҙылған ҡағыҙ һалып ҡалдыра. Иртәгәһенә таблица төҙөп, иренә эсерә башлай. Көн һайын билдәле бер ваҡытта, тейешле күләмдә шыйыҡсаны бирә бара. Ғүмәр, терелеп, аяҡҡа баҫа. "Яман ауырыуҙың беренсе һәм икенсе стадияһы менән сирләп миңә килгәндәр бихисап. Һуңғы ваҡытта өсөнсө-дүртенсе стадиялағылар ҙа мөрәжәғәт итә башланы. Шулай уҡ йөрәк, ашҡаҙан, бауыр, быуындар ауыртыуы, ҡолаҡ һыҙлауы менән килеүселәр күп. Намаҙ уҡыған, диндәге кешеләргә дарыуҙы айырым яһайым. Дин буйынса, составында спирт булған дарыу ҡулланыу тыйыла. Ундайҙарға үләнде ҡайнатып, төнәтеп бирәм", - ти Гөлсирә Нәжметдинова. Ҡасандыр ярҙам һорап килгән берәүгә киләсәген дә әйткеләп ултырған ул. Икенсе көнөнә бының күршеһе, һеҙҙе күрәҙәсе тиҙәр, тип бер альбом күтәреп килгән. Үләндәр менән дауалаусы мин, ә күрәҙәсе түгел, тип үләндән яһалған дарыуҙарын күрһәтеп кенә ышандыра уны. Шунан һуң табибәнең төшөнә бер ап-аҡ бабай инә. "Һин ни өсөн кешегә киләсәген әйттең әле? Әйтергә ярамай, уға зыян киләсәк", - ти ул. "Ҡурҡып уянып киттем. Шунан һуң бер һүҙ ҙә әйткәнем юҡ. Мин күрәҙәсе түгел”, - ти Гөлсирә ханым. Бөтә кешелә лә яман шеш күҙәнәктәре бар, ти дауалаусы. Күп осраҡта улар стрестан, организм көсһөҙләнгән саҡта тамыр йәйә башлай. Башланған осоронда билдәләре булмаҫҡа ла мөмкин, сөнки шеш ауыртмай, шуға күрә йылына бер мәртәбә булһа ла табипҡа күренеп торорға кәрәк, тип белдерә Гөлсирә Нәжметдинова. “Меңъяпраҡ үләне бөтә нимәгә лә файҙалы. Яман шеш аҙған ваҡытта кеше дүрт йыл буйы дауаланырға тейеш. Үләндәргә организмды өйрәтергә лә ярамай. Ял итә-итә генә эсергә кәрәк. Насар ауырыуҙы ағыу бөтөрә. Себен бәшмәге (тырҡыш), катарантус гөлөнән эшләнгән дарыуҙар бик файҙалы, белеп яһаған осраҡта, әлбиттә. Дарыуҙы 40 градустан да көслөрәк спиртта яһарға ярамай, шуны онотмаҫҡа кәрәк”, - ти үләндәр серен белгән апай. ИҒТИБАР! Был мәғлүмәт ҡулланма рәүешендә түгел, ә таныштырыу маҡсатында ғына бирелде. Дауаланыр алдынан табип менән кәңәшләшегеҙ.Сығанаҡ: Юлиә Насибуллина. Tatar Today: https://tatar-today.ru/2018/11/37562/