Радий Хәбиров яңа поликлиниканың әзерлек дәрәҗәсен карады

Объектның бәясе 2 миллиард сумга якын. Медицина учреждениесе составына шулай ук 6нчы балалар поликлиникасы филиалы һәм хатын-кызлар консультациясе кергән.Радий Хәбиров регистратура эше белән танышты, операция бүлмәсен, стоматология, УЗИ, функциональ диагностика, гастроскопия кабинетларын карады. Поликлиника яңа медицина җиһазлары белән тәэмин ителгән — компьютер томографы, рентген-аппарат, эндоскопик һәм офтальмологик приборлар, маммограф бар. Поликлиникада шулай ук даруханә пункты эшләячәк, шул исәптән ташламалы дарулар белән тәэмин итү өчен дә.9нчы дәваханәнең баш табибы Марсель Зарипов әйтүенчә, җиде катлы бинаның гомум мәйданы 13,3 мең квадрат метр тәшкил итә, бу элек пациентларны кабул иткән поликлиникалардагыдан биш тапкыр күбрәк. Поликлиниканың проект куәте — сменасына 900 кеше. Бина үз эченә аерым керү урыннары булган өч блокны ала: өлкәннәр, балалар һәм хатын-кызлар консультациясе. Биредә Уфаның Ленин районында яшәүче 26 мең өлкән кеше һәм 15 мең бала табиб ярдәме алачак.– Киләчәктә без Уфа районында яшәүче 37 мең кешене поликлиникага беркетергә планлаштырабыз, - дип билгеләп үтте Марсель Зарипов.Терапевтлар, педиатрлар һәм профильле белгечләр белән аралашканда төбәк Башлыгы коллективка уңышлар теләде һәм якынлашып килүче һөнәри бәйрәм белән котлады. Медицина хезмәткәре көне 18 июньдә билгеләп үтелә. 6нчы балалар поликлиникасының баш табибы Лиана Савина яңа филиалда төрле юнәлешләр буенча белгечләр кабул итәчәген сөйләде. Биредә профилактика, амбулатор медицина реабилитациясе, лаборатория, нурланыш һәм функциональ диагностика, физиотерапия бүлекләре урнаштырылган. Моннан тыш, «Менталь сәламәтлек» округ иҗтимагый проекты кысаларында балалар поликлиникасында психик тайпылышлары булган балаларда соматик патологияләрне диагностикалау һәм дәвалау булачак. - Бу поликлиниканы без шактый озак төзедек. Зур акчалар керттек һәм иң яхшы җиһазлар белән җиһазландырдык. Киләсе дүшәмбедән монда пациентлар кабул ителә башлаячак. Дим районында шундый ук заманча поликлиника булдыру мөмкинлеген тикшерәбез, - диде Радий Хәбиров. - Якын арада Уфада беренчел звено медицина учреждениеләрен тәртипкә китерә башлыйбыз. Аларның күбесенә күптән капиталь ремонт кирәк. Шуңа күрә без нәкъ менә Башкортстан башкаласы өчен аерым программа эшләргә карар кылдык. Ул биш елга исәпләнгән һәм 2024 елдан эшли башлаячак. Акчаларны биналарны капиталь ремонтлауга, медицина җиһазлары һәм транспорт сатып алуга юнәлтәчәкбез. Уфа поликлиникаларын модернизацияләү буенча масштаблы мәсьәләне хәл итәргә тырышачакбыз.