Ниһәйәт, көтөп алдыҡ!

Башҡортостан Башлығы Радий Хәбиров Өфөнөң Затон биҫтәһендә асылған 9-сы дауахананың ете ҡатлы яңы поликлиникаһын ҡараны. Ул “Һаулыҡ һаҡлау” милли проектының “Һаулыҡ һаҡлауҙың тәүге звеноһын яңыртыу” программаһына ярашлы төҙөлдө. Төҙөлөш хаҡы ике миллиард һумға яҡын тәшкил итте. Медицина учреждениеһы составына шулай уҡ 6-сы балалар поликлиникаһы филиалы һәм ҡатын-ҡыҙҙар консультацияһы инә. Радий Хәбиров регистратура, участка терапевты, стоматология, операция, ультратауыш, функциональ диагностика, гастроскопия кабинеттары менән танышты. Поликлиника өр-яңы медицина ҡорамалдары менән йыһазландырылған. Бында дарыухана пункты эшләйәсәк, шул иҫәптән льготалы дарыуҙар менән тәьмин итеү ойоштороласаҡ. 9-сы дауахананың баш табибы Марсель Зарипов әйтеүенсә, бина майҙаны элекке поликлиника майҙанынан биш тапҡырға ҙурыраҡ. Бында Ленин районының 41 мең кешеһе хеҙмәтләндереләсәк. Башҡортостан Башлығы социаль селтәрҙә баш ҡалала тағы бер поликлиниканың эш башлауы айҡанлы һөйөнөсө менән уртаҡлашҡан: “Бөгөн Өфөнөң Затон биҫтәһендә 9-сы ҡала дауаханаһының поликлиникаһын астыҡ. 19 июндә бында тәүге пациенттарҙы ҡабул итәсәктәр. Поликлиника сменаһына 900 кеше ҡабул итеүгә иҫәпләнгән. Әле уға Ленин районының 26 мең өлкән кешеһе һәм 15 мең бала теркәлгән. Ә киләсәктә бында Өфө районының яҡында йәшәгән тағы 37 мең кешеһе хеҙмәтләндереләсәк. Бөтә табиптар, тар белгестәрҙе лә индереп, бер урында, медицина ҡорамалдары өр-яңы – Затондағы поликлиника тәүге звено учреждениеһының нисек булырға тейешлеген күрһәткән өлгө. Ҡыҙғанысҡа ҡаршы, республикабыҙ баш ҡалаһында күп поликлиникалар был идеалдан алыҫ. Һуңғы йылдарҙа беҙ ауылдарҙа һәм бәләкәй ҡалаларҙа һаулыҡ һаҡлауҙың тәүге звеноһын камиллаштырыу өсөн күп эш башҡарҙыҡ. Барыһынан да элек Президент программаһы иҫәбенә. Бер миллиондан ашыу халыҡ йәшәгән Өфө ҡалаһы уға инмәй. Бында ла биналарҙың туҙыуы менән хәл шундай уҡ. Шуға күрә был хәлде үҙгәртергә ҡарар иттек. Мин Хөкүмәткә һәм Һаулыҡ һаҡлау министрлығына Өфө ҡалаһында 2029 йылға тиклем поликлиникаларҙы үҫтереү программаһын эшләргә ҡуштым.Шуға ярашлы, капиталь ремонт эшләйәсәкбеҙ, ҡорамал һатып аласаҡбыҙ, медицина учреждениеларының автомобиль паркын яңыртасаҡбыҙ. Бөгөн был программаны “Сәләмәтлек сәғәте”ндә тикшерҙек. Ул 2024 йылда эш башлаясаҡ. Бөтәгеҙгә лә һаулыҡ теләйем!” Фото:"Башинформ"