Программаға ихтыяж ҙур

Бөгөн аҙналыҡ оператив кәңәшмәлә “Башҡортостан ихаталары” йорт яны биләмәләрен комплекслы төҙөкләндереү һәм йәмәғәт киңлектәрен яңыртыу буйынса республика программаһын тормошҡа ашырыуға яҡынса йомғаҡ яһалды. – “Башҡортостан ихаталары” программаһының дөйөм бюджеты – 1,272 миллиард һум, был уҙған йылға ҡарағанда 17 процентҡа күберәк. Был республиканың 30 муниципалитетында 206 ихата биләмәһен яңыртырға мөмкинлек бирәсәк, – тине Башҡортостандың торлаҡ-коммуналь хужалыҡ министры вазифаһын башҡарыусы Юрий Палтусов. – Был эште 2023 йылдың 30 авгусына тиклем тамамларға планлаштырабыҙ. Июнь башына төҙөкләндереү объекттарының әҙерлеге – 40 процент. Мәҫәлән, Октябрьскийҙа, Туймазыла һәм Дүртөйлөлә ихаталарҙы төҙөкләндереү тамамлана. Шул уҡ ваҡытта Ағиҙелдә, Бәләбәйҙә, Нефтекамала, Дәүләкәндә, Межгорьела, Баҡалы, Шишмә һәм Шаран райондарында планды 30 проценттан аҙыраҡҡа үтәгәндәр. Юрий Палтусов, төҙөлөш-монтажлау эштәренә инициатив төркөмдәрҙең йәмәғәт комиссияһы составында объекттарҙы ҡабул иткәндән һуң ғына түләнәсәк, тип айырым билдәләне. “Уңайлы ҡала мөхитен булдырыу” федераль программаһы буйынса 2023 йылда барлыҡ муниципаль берәмектәрҙә 123 йәмәғәт биләмәһе төҙөкләндерелә, шулай уҡ 2021 йылда федераль конкурста еңеү яулаған проекттар буйынса эштәр тамамлана. Улар иҫәбендә – Стәрлетамаҡ, Туймазы, Күмертау, Межгорье, Бәләбәй һәм Бөрө ҡалаларындағы майҙансыҡтар. Шулай уҡ Ағиҙелдә, Дүртөйлөлә, Ишембайҙа, Мәләүездә һәм Яңауылда 2022 йылғы конкурста еңеүсе биш проектты ғәмәлгә ашырырға ниәтләйҙәр. – Ауыл биләмәләрендә төҙөкләндереү эштәрен – 2023 йылдың 1 сентябренә, ә ҡалаларҙа 30 октябргә тиклем тамамларға ниәтләйбеҙ. “Уңайлы ҡала мөхитен булдырыу” программаһы буйынса бөтә объекттарҙың уртаса әҙерлеге 33 процент тәшкил итә, – тине Юрий Палтусов. – Планлаштырылған эштәрҙе башҡарып, халыҡты яңы объекттар менән ҡыуандырған муниципалитеттар ҙа бар. Улар – Архангел, Дыуан, Күгәрсен һәм Стәрлебаш райондары. Башҡортостандың торлаҡ-коммуналь хужалыҡ министры вазифаһын башҡарыусы әйтеүенсә, 2024 йылда яңыртырға күҙалланған төҙөкләндереү объекттары өсөн Бөтә Рәсәй электрон тауыш биреү йомғаҡтары буйынса 123 объект билдәләнде. Йәмәғәт киңлектәрен һайлауҙа ҡатнашҡандарҙың һаны һәм өлөшө буйынса республика Рәсәй төбәктәре араһында алтынсы һәм Волга буйы федераль округында беренсе урын яуланы. Тауыш биреүҙә бөтәһе 759 меңдән ашыу кеше ҡатнашты. Башҡортостан Башлығы Радий Хәбиров Торлаҡ-коммуналь хужалыҡ министрлығына эштәрҙе сифатлы һәм ваҡытында башҡарырға ҡушты. Фото: Башҡортостан Башлығы сайты.