Һәләк булған хәрби әсәһенә - юғары исем

Бөгөн Хөкүмәттең аҙналыҡ кәңәшмәһендә Башҡортостан Башлығы Радий Хәбиров махсус хәрби операцияла һәләк булған Альберт Кәримовтың әсәһе Рена Кәримоваға Башҡортостандың атҡаҙанған уҡытыусыһы исеме бирелеүе тураһында әйтте. Хәрбиҙең әсәһе әле һаман эшләүен дауам итә, ул Тирләндә математиканан уҡыта. Ҡатын биш бала тәрбиәләп үҫтергән, уларҙың өсәүһе – кадрлы офицерҙар. – Мин Рена Ивановнаға “Башҡортостандың атҡаҙанған уҡытыусыһы” исемен биреү тураһындағы указға ҡул ҡуйҙым. Беҙ барыбыҙ ҙа һеҙҙең алда баш эйәбеҙ. Ҙур ғаиләгеҙгә, улдарығыҙға сәләм. Альберт һәр саҡ беҙҙең хәтерҙә буласаҡ, – тине Радий Хәбиров. Кәңәшмәлә видеобәйләнеш аша ҡатнашҡан уҡытыусы рәхмәт һүҙҙәре әйтте. – Үҙемдең, балаларымдың исеменән республикаға ҙур рәхмәтемде еткерәм. Шулай уҡ Белорет районы хакимиәте башлығы Андрей Иванютаға һәм Тирлән етәкселегенә ярҙам өсөн рәхмәт. Минең Альберт улым Еңеү Рәсәйҙеке буласаҡ ти ине, һәм беҙ быға ышанабыҙ, – тине Рена Кәримова. Кәңәшмә барышында Радий Хәбиров махсус хәрби операцияла һәләк булған өлкән лейтенант Дмитрий Загребиндың тол ҡатынына ярҙам итергә ҡушты. Тап ошо көндә уны Стәрлетамаҡ ҡалаһында һуңғы юлға оҙатыуҙа Радий Фәрит улы ла ҡатнашҡайны. – Бик ауыр юғалтыу, йәш кенә егет. Бик шәп яугир булған. Әсәһе һәм ҡатыны ҡалды. Хакимиәт башлыҡтарына тағы бер тапҡыр әйтәм: был ғаиләләр беҙҙең иғтибарҙан төшмәҫкә тейеш, – тине ул. Радий Хәбиров белдереүенсә, ғаилә йәшәгән хәрби часть Улан-Удэ ҡалаһында булған. Хәрбиҙең ҡатыны Стәрлетамаҡта тыуған, әле ул артабан ҡайҙа йәшәргә икәнлеген хәл итмәгән. – Беҙгә күсеп ҡайтһа, бөтә яҡлап та ярҙам итергә кәрәк буласаҡ, – тине республика етәксеһе. Башҡортостанда еңел сәнәғәт өлкәһе етештереүселәре һуңғы ике йылда республика хөкүмәтенән 500 миллион һум күләмендә ярҙам алды. 2023 йылда тармаҡты үҫтереүгә 155 миллион ҡаралған. Хөкүмәттәге оператив кәңәшмәлә республика Башлығы Радий Хәбиров ошо сумманы иғлан итте. “Мөмкинлек булһа, һәр саҡ әйтәм, уларға күберәк ярҙам итергә кәрәк. Ошо ваҡыт эсендә улар үҙҙәрен нығытһын. Хәҙер баҙар ҙа асыла, сөнки Көнбайыш етештереүселәре китте һәм уларға үҙ урынан табырға мөмкин, был йәһәттән уларға ярҙам итергә кәрәк. Улар юғары технологик ҡорамалдарға сығыу, сифатлы сеймал һатып алыу мөмкинлегенә эйә булһын һәм шуға ярашлы етештерергә өйрәнһен өсөн, - тине Башҡортостан етәксеһе. Башҡортостан Башлығы совет осоронда уҡ төҙөлгән парктарҙағы күркәм инеү төркөмдәрен тергеҙеүҙе дауам итергә ҡушты. Бындай төркөмдәрҙең береһе ошо көндәрҙә асылған Нефтехимиктар паркында урынлашҡан. “Ниһайәт, төҙөкләндерелгәндән һуң Нефтехимиктар паркын астыҡ. Совет осоронда бындай матур инеү төркөмдәре булған ерҙә уларҙы тергеҙергә кәрәк. Нефтехимиктар паркын һыҙымдар буйынса тергеҙҙек, – тине республика Башлығы. – Хәҙер Аксаков исемендәге баҡсаға ингән шундай уҡ төркөмдө тергеҙәбеҙ”. Республикала парктар булдырыу буйынса байтаҡ аҡса һалыуҙы талап иткән эш дауам итә, тип билдәләне Хәбиров. Башҡортостанда уҙған тәүлектә 30 кешелә коронавирус инфекцияһы асыҡланған. Әлеге ваҡытта 83 пациент, шул иҫәптән 60 йәштән өлкәнерәк 59 кеше стационарҙа дауалана. Ә 929 кеше амбулатор шарттарҙа дауалана, уларҙың 279-ы - өлкән йәштәге ауырыуҙар. Был хаҡта кәңәшмәлә Башҡортостандың һаулыҡ һаҡлау министры Айрат Рәхмәтуллин хәбәр итте. Министр һүҙҙәренсә, йоғошло сирҙәр госпиталдәрендә буш койка фонды 34,4 процент тәшкил итә. Тәүлек эсендә 33 кеше коронавирус инфекцияһынан һауығып сыҡҡан, бер кеше вафат булған. Фото: Башҡортостан Башлығы матбуғат хеҙмәте.