Авылның коты алар!

Кырмыскалы районының Иске Кыешкы авылында үзләренең уңганлыгы һәм тырышлыгы белән абруй казанган гаиләләр байтак. Камалетдиновлар – шуларның берсе.Менә инде 45 ел Таһир Шәрифулла улы һәм Флүрә Гомәр кызы бер-берсенә йөрәк җылысын биреп, кулга-кул тотынышып, тату гомер итәләр. Гаилә башлыгы Таһирның әтисе Шәрифулла, әнисе Роза бик уңган кешеләр иде. Хәзер алар мәрхүм инде. Уллары да, әти-әнисеннән үрнәк алып, тәртипле булып үсте, мәктәптә яхшы укыды. Әле дә тормыш юлын үрнәкле үтә. Кулыннан килмәгән эш юк аның. Аның кебекләр турында “алтын куллы” диләр. Югары разрядлы эретеп ябыштыручы да ул.Хатыны Флүрә Гомәр кызы тумышы белән Ишембай районының Бикчән авылыннан. Салават педагогия училищесын тәмамлап, кулына диплом алгач, Иске Кыешкы авылына башлангыч сыйныфлар укытучысы булып килде. Гомер аккан су кебек: аның С. Т. Аксаков исемендәге Иске Кыешкы мәктәбендә эшли башлавына да 35 ел үтеп киткән. Хәзерге вакытта ул хаклы ялда. Сабыр холыклы һәм тырыш укытучыны балалар да, аларның әти-әниләре дә ихтирам итә. Шәхсән минем үземә дә аның белән байтак еллар бергә эшләргә туры килде.29 ел буе әти-әниләре белән бергә яшәделәр. Соңыннан зур һәм күркәм йорт салып, башка чыктылар. Әти-әниләрен кадерләп тәр­бияләп, соңгы юлга хөрмәт­ләп озаттылар.Камалетдиновлар Илдар, Данис һәм Илнур исемле өч ул үстерде. Мәктәптә укыганда ук алар откыр һәм зиһенле булуы белән аерылып торды. Мәктәптә һәм район күләмендә үткәрелгән фән олимпиадаларында һәм спорт ярышларында катнаштылар. Әле дә спортны ташламыйлар. Өчесе дә ил алдындагы изге бурычларын үтәп кайтты. Югары белем алдылар. Һәрберсе үз гаи­ләсе белән Уфа шәһәрендә яши. Өлкәне Илдар – баш энергетик, Данис – нефть эшкәртү заводында оператор, Илнур эре оешмада мастер вазыйфасында. Ә ял көннәрендә Камалет­динов­ларның йортлары балалары һәм оныкларының шатлыклы тавышлары белән тула.Чын авыл тормышы белән яши Камалетдиновлар: кош-корт асрыйлар, бакча тутырып җиләк-җимеш үстерәләр. Флүрә Гомәр кызы ел буена җитәрлек компотлар, кайнатмалар, салатлар эшләп куя. Аллы-гөлле чәчәкләр үстерергә, тәмле-тәмле ризыклар пешерергә дә оста ул.Авылыбызның җәмәгать эшендә дә актив катнаша алар. Таһир Шәрифулла улы – авылның старостасы. Авылдагы проблемаларны хәл итүгә күп көч сала. Флүрә Гомәр кызы сайлау кампаниясе чорында актив катнаша. Клубтагы “Хатирә” ансамб­ленә дә зур теләк белән йөри. Күптән түгел авылыбызда үткәрелгән “Без җиңәбез!” акциясе чиклә­рендә махсус хәрби опе­рациядә катнашучы якташларга күмәкләп чәк-чәк пешереп җибәрделәр.Менә шулай, татулыкта, бердәм­лектә, балаларының һәм оныкла­рының уңыш­ларына сөенеп, авыл­дашларының хөрмәтенә төренеп яши бәхетле пар.Зәлифә ГАДЕЛШИНА,мәгариф ветераны.Кырмыскалы районы.