"Беҙ барыбыҙ ҙа ҡасандыр берҙәм ижади берләшмәнең бөтөн өлөшө булдыҡ"

11 июндә М.В. Нестеров исемендәге Башҡорт дәүләт художество музейының конференциялар залында Башҡортостандың һәм Беларусь республикаларының билдәле рәссамдары менән осрашыу үтте. Осрашыу Рәсәй – Беларусь төбәктәренең Х форумы сиктәрендә үтәсәк “Башҡортостан дуҫтары күҙлегенән” халыҡ-ара арт-пленэры алдынан уҙҙы. Акцияла пленэр һәм күргәҙмә эшендә бай тәжрибәгә эйә булған, төрлө стилдәрҙә һәм йүнәлештәрҙә ижад иткән 18 рәссам ҡатнашты. Арт-пленэр маршруты Башҡортостандың матур, тарихи һәм иҫтәлекле урындары ул: Урал тәбиғәте, тауҙар, баҫыуҙар, урмандар, йылғалар һәм һын һүрәттәре. “Башҡортостан дуҫтар күҙлегенән” арт-пленэры етәксеһе, Башҡортостандың Рәссамдар союзы рәйесе Хатип Фазылов ошондай проекттарҙың берләштереүсе ролен билдәләне. – Беҙ барыбыҙ ҙа ҡасандыр берҙәм ижади берләшмәнең бөтөн өлөшө булдыҡ һәм рәссамдарҙың аралашыу традицияһы тергеҙелеүенә шатбыҙ. Быйылғы пленэрҙағы эштәрегеҙҙә республикабыҙҙың матурлығы, уның кешеләре, ауылдарҙың һәм ҡалаларҙың йөҙҙәре — һеҙҙең күңелегеҙҙә яңғыраш алған бөтә нәмә төп урынды биләйәсәк. Һеҙҙең оҫталығығыҙ, матурлыҡ тойғоһо менән бергә, беҙҙең яҡтың матурлығының яңы яҡтарын асырға мөмкинлек бирер, тип ышанам. Был әҫәрҙәр һеҙҙең эштәрегеҙҙә иң яҡшыһы булһын тип теләйем, — тип һыҙыҡ өҫтөнә алды Хәтип Сәрүәр улы. Проектта ҡатнашыусы – Беларусь Республикаһының атҡаҙанған сәнғәт эшмәкәре Виктор Барабанцев пленэрға үҙенең өмөттәре һәм ижади пландары менән уртаҡлашты: – Мин Өфөлә беренсе тапҡыр түгел, ҡасандыр бында монументаль эштәр башҡарҙым — ул саҡта уҡ ҡалағыҙҙы һәм уның халҡын бөтә күңелем менән яраттым. Ойоштороусыларға ошондай киң программа, яҡшы шарттар өсөн рәхмәт белдерәм һәм бөтәһенә лә, йыйылған материал нигеҙендә үҙемә лә, иң яҡшы әҫәрҙәр яҙыуҙы теләйем. Шәхсән башҡорт милли кейемендәге ҡыҙҙың портретын төшөрөр инем, — тине Виктор Кириллович. Июнь аҙағына тиклем туғандаш республикаларҙың 18 рәссамы “Урал батыр” туроператоры менән Башҡортостандың иҫтәлекле һәм тарихи урындарында буласаҡ. Рәссамдар Ғафури районының һоҡланғыс күренештәрен һәм Алһыу ҡаяларын, Инйәрҙең матур ярҙарын, шулай уҡ Торатау, Нөгөш һыу һаҡлағысы һәм Мораҙым тарлауығы шихандарының гүзәллеген төшөрәсәк. Арт-пленэрҙы республиканың төньяғында дауам итәсәктәр: Павловка һыу һаҡлағысы һәм Красный ключ шишмәһе, артабан ул Өфө буйлап сәйәхәт менән тамамланасаҡ. Осрашыуҙың рәсми өлөшөн “Башҡортостан дуҫтар күҙлегенән” арт-пленэрҙы ойоштороу комитеты ағзаһы, М.В. Нестеров исемендәге Башҡорт дәүләт художество музейы директоры Айрат Тереғолов ижадтың быуаттар буйына йәмғиәттәрҙе һәм халыҡтарҙы берләштереүен, ә һүрәт теленең универсаль аралашыу сараһы булыуын билдәләне. Ул шулай уҡ пленэр йомғаҡтары буйынса эштәр күргәҙмәһе өсөн музейҙың үҙ залдарын асырға әҙер булыуын һыҙыҡ өҫтөнә алды. Проект Башҡортостан Хөкүмәте һәм Мәҙәниәт министрлығы, М.В. Нестеров исемендәге Башҡорт дәүләт художество музейы һәм Башҡортостандың Рәссамдар союзы тәҡдиме һәм ярҙамы менән ойошторола. Фото: рәсми сығанаҡтан.