Башҡортостанда халыҡты диспансерлаштырыу дауам итә. Һаулыҡ һаҡлауҙың тәүге звеноһы йыл башынан 584 меңдән ашыу кешене ҡабул итте. Иҫкәртеү тикшереүен – 98 556, тәрәнтен диспансерлаштырыуҙы 169 170 кеше үтте. 17 апрелдән республикала “Сәләмәт республика –сәләмәт төбәк” акцияһына ярашлы, алты йүнәлеш буйынса “Сәләмәтлек поездары” юлға сыҡты. Июль башына 52 меңдән ашыу кеше ҡабул ителгән. Ошо ваҡыт эсендә медицина тикшереүҙәре һөҙөмтәһендә 861 кешелә – йөрәк-ҡан тамырҙары, 85 кешелә – яман шеш, 356 кешелә – шәкәр диабеты,туғыҙ кешелә туберкулез сирҙәренә шик тыуған. Ғ.Ҡыуатов исемендәге республика клиник дауаханаһына тикшереү үтеү өсөн – 408, дауаханаға ятыу өсөн 84 кеше ебәрелгән.Республика кардиология үҙәгенә тикшерелеү өсөн 47 пациентҡа йүнәлтмә бирелгән. Иҫегеҙгә төшөрәбеҙ, диспансерлаштырыуҙы даими үтеү инвалидлыҡҡа һәм үлемгә килтереүсе хәүефле сирҙәргә юлығыу ихтималлығын кәметә йәки уларҙы иртә стадияла асыҡларға, тәьҫирле дауаларға ярҙам итә. “Һаулыҡ һаҡлау”милли проекты халыҡҡа бушлай тикшереү үтеү мөмкинлеген бирә. Әгәр һеҙҙең йәшегеҙ 18-ҙән 39 йәшкә тиклем икән, уны өс йылда бер тапҡыр үтә алаһығыҙ.40 йәштән өлкәнерәктәр уны йыл һайын үтә ала. Бының өсөн үҙегеҙ теркәлгән поликлиникаға мөрәжәғәт итә алаһығыҙ. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.