Тиңләшерлек өлгө бар

Республикала 2021-2022 йылдарҙа 142 медицина объекты төҙөлдө, 40 бинаға капиталь ремонт эшләнде, 5 593 ҡорамал һәм 167 автотранспорт сараһы алынды. Быйыл “Һаулыҡ һаҡлау” милли проектының “Һаулыҡ һаҡлауҙың тәүге звеноһын яңыртыу” программаһына ярашлы биш объектҡа капиталь ремонт үткәреләсәк. Шулай уҡ Баймаҡ ҡалаһында һәм Мәсәғүт ауылында балалар поликлиникаларын, Оло Ыҡтамаҡта ашығыс ярҙам станцияһы менән дауахана төҙөү дауам итә. Ә Ҡырмыҫҡалы үҙәк район дауаханаһының корпусы үҙгәртеп ҡороласаҡ. Һаулыҡ һаҡлауҙың тәүге звеноһын яңыртыу мәсьәләһе, һис шикһеҙ, көн үҙәгенән төшмәйәсәк – был хаҡта Башҡортостан Башлығы Радий Хәбиров Өфөләге 9-сы ҡала дауаханаһының яңы поликлиникаһын асыу тантанаһынан һуң үткән “Сәләмәтлек сәғәте” кәңәшмәһендә тағы бер ҡат белдерҙе. Төбәк етәксеһе билдәләүенсә, Өфөләге дауалау учреждениеларының хәҙерге торошо өфөләргә сифатлы медицина хеҙмәттәрен алырға мөмкинлек бирмәй. Республика ауыл һәм бәләкәй ҡалалар инфраструктураһын камиллаштырыуға байтаҡ көс һәм средстволар бүлә. Хәҙер баш ҡаланың медицина учреждениеларын тәртипкә килтерергә кәрәк. – Был тиҙ процесс түгел, әммә Өфө өсөн профилле программа ҡабул итһәк, һаулыҡ һаҡлауҙың ҡала системаһын аҡрынлап яңырта аласаҡбыҙ, – тине Радий Хәбиров. Башҡортостан Башлығы республика Хөкүмәтенә һәм Һаулыҡ һаҡлау министрлығына ошо йылдың 15 авгусына тиклем Өфөнөң тәүге звеноһын этаплап яңыртыу планын әҙерләргә һәм финанслауҙы тәьмин итергә ҡушты. Яҡынса 2024 йылда был маҡсатҡа 500 миллион һум, ә киләсәктә йыл һайын бер миллиард һум аҡса йүнәлтеләсәк. Программаны бер нисә йүнәлеш буйынса тормошҡа ашырасаҡтар. Транспорт паркы яңыртыласаҡ, яңы ҡорамалдар алынасаҡ, поликлиникаларға капиталь ремонт үткәреләсәк һәм дауаханалар төҙөләсәк. Өфөнөң Дим районында яңы поликлиника төҙөү планлаштырыла. Башҡортостан Башлығы “Һаулыҡ һаҡлау” милли проектына ярашлы Өфөнөң Затон биҫтәһендә асылған яңы поликлиника менән һоҡланыуын белдерҙе. 19 июндә бында тәүге пациенттарҙы ҡабул итәсәктәр. Поликлиника сменаһына 900 кеше ҡабул итеүгә иҫәпләнгән. Әле уға Ленин районының 26 мең өлкән кешеһе һәм 15 мең бала теркәлгән. Ә киләсәктә бында Өфө районының яҡында йәшәгән тағы 37 мең кешеһе хеҙмәтләндереләсәк. Радий Хәбировтың әйтеүенсә, Затондағы яңы поликлиника тәүге звено учреждениеһының нисек булырға тейешлеген күрһәткән яҡшы өлгө. Тимәк, медицина тармағын тағы ла юғарыраҡ үрҙәр, ҙурыраҡ эштәр көтә. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.