Үҫешкә тағы бер аҙым

Донъя кимәлендәге Евразия ғилми-белем биреү үҙәгенең вуз-ара студенттар кампусы – Башҡортостандың фәнде, мәғарифты һәм йәштәр технологик эшҡыуарлығын үҫтереү үҙәге. Ул бер юлы бер нисә вуздың эшмәкәрлеген берләштергән территория. Өфө дәүләт нефть техник университеты – шуларҙың береһе. Вуз-ара кампуста вуз бер юлы бер нисә майҙансыҡ урынлаштырырға планлаштыра, уларҙың береһе университет стартап-студияһы буласаҡ. Өфө дәүләт нефть техник университетының стартап-студияһы 2022 йылда “Инфраструктура һәм белем биреү программалары фонды” һәм юғары уҡыу йортонда технологик эшҡыуарлыҡты үҫтереү өсөн шәхси инвесторҙар төркөмө булышлығында асылған. ӨДНТУ илдең был проект тормошҡа ашырылған 20 юғары уҡыу йорто иҫәбенә инде. – ӨДНТУ-ның стартап-студияһын вуз-ара кампуста урынлаштырыу – Өфө дәүләт нефть техник университетының һәм Башҡортостандың башҡа юғары уҡыу йорттарының эшҡыуарлыҡ миссияһын үҫтереү стратегияһының дауамы. Ул “ҡайнау нөктәләре” һәм акселерация программалары менән бер рәттән республикала университет технологик эшҡыуарлығын үҫтереү элементтарының береһе буласаҡ, – тине Өфө дәүләт нефть техник университетының Технологиялар трансферы идаралығы начальнигы Сергей Гладких. Башҡортостан юғары уҡыу йорттары консорциумы эшҡыуарлыҡ башланғыстарын үҫтереү өсөн ете төп йүнәлеште билдәләне лә инде: нефть-газ проекттары, декарбонизация технологиялары, IT, медицина, мәғариф, аграр проекттар һәм “яңы йәшәү мөхите”. Әлеге ваҡытта студияла бер нисә университет хеҙмәткәрҙәре, уҡытыусылары һәм студенттары эшләй, илдең үҫеш институттары һәм технологик партнерҙар менән хеҙмәттәшлек яйға һалынған. 2024 йылға стартап-студия эшендә 250 студентты йәлеп итеү планлаштырыла. Стартап-студия – ул стартаптарҙың “фабрикаһы”, бизнес-идеяларҙы тиҙ тикшереүгә һәм күпләп яңы юғары технологиялы компаниялар етештереүгә йүнәлтелгән технологик эшҡыуарлыҡты үҫтереү форматы. Студия сериялы рәүештә яңы компаниялар төҙөй һәм продукция, бизнестың йәшәү циклының бөтә этаптарында типовой операцияларҙы: бизнес-гипотез әҙерләүҙе һәм уны тикшереүҙе, продуктты әҙерләүҙе, юридик шәхесте рәсмиләштереүҙе, арттырыуҙы, финанслауҙы үҙ өҫтөнә ала. Үҙ бизнесын булдырып, йәш эшҡыуарҙар идеяларын тормошҡа яраҡлылыҡҡа тикшереү һәм яҡланған университет мөхитендә финанслау йәлеп итеү мөмкинлегенә эйә була. 2023 йылдың аҙағына кампусты файҙаланыуға тапшырыуҙың беренсе сиратын тормошҡа ашырыу сиктәрендә Өфө дәүләт нефть техник университетының стартап-студияһын вуз-ара кампус базаһында урынлаштырыу күҙаллана. Хәтерегеҙгә төшөрәбеҙ, Евразия ғилми-белем биреү үҙәгенең юғары уҡыу йорттары араһында студенттар кампусы төҙөлөшө “Фән һәм университеттар” милли проекты сиктәрендә дәүләт-шәхси партнерлыҡ механизмдарын һәм концессия килешеүҙәрен файҙаланып, инновацион белем биреү мөхитен булдырыу буйынса федераль программа сиктәрендә тормошҡа ашырыла. Фото һәм сығанаҡ: https://pravitelstvorb.ru/news/21115/