Тиҙҙән еңеү менән ҡайтырбыҙ!

Бөгөн Совет майҙанынан йола буйынса тантаналы шарттарҙа хәрби әҙерлек үтеү өсөн “Башҡортостан” мотоуҡсылар полкының Советтар Союзы Геройы Миңлеғәле Ғөбәйҙуллин исемендәге батальонын оҙаттылар. Улар менән бергә Һамарға хәрби әҙерлек үтергә мотоуҡсылар полкының матди тәьминәт һәм ремонт ротаһы ла китте. Тантана башында батальон командиры Фәрит Миһранов Башҡортостан Башлығына хәрби подразделение теҙелеүе тураһында хәбәр итте, унан һуң Радий Хәбиров Стратегик башланғыстар агентлығының генераль директоры Светлана Чупшева менән легендар дивизия командиры Миңлеғәле Шайморатовтың һәйкәленә сәскәләр һалды. – Бөгөн беҙ Миңлеғәли Ғөбәйҙуллин исемендәге батальонды һәм ике подразделениены хәрби көйләүгә оҙатабыҙ. Шулай итеп, беҙ Башҡорт ирекле мотоуҡсылар полкын ойоштороуҙы тамамлайбыҙ тиерлек. Уның ике батальоны һәм биш подразделениеһы әле үк хәрби әҙерлек үтә. Республика исеменән һеҙгә ябай булмаған ҡарар – Ватанды һаҡлауға баҫырға ҡарар итеүегеҙ өсөн рәхмәт белдерәм. Халыҡ һеҙгә рәхмәт белдерә һәм оло ихтирам менән ҡарай. Тыныс ваҡытта ҡулға ҡорал алыу – был еңел булмаған, әммә бик кәрәкле аҙым. Меңләгән мобилизацияланған егеттәребеҙ һәм доброволецтар үҙҙәренең хәрби бурысын үтәй ҙә инде, батырлыҡ һәм ҡаһарманлыҡ күрһәтә. Хәрби яйға һалыу осоро буйына һеҙҙең менән бергә буласаҡбыҙ, – тине Радий Хәбиров. – Республиканың бурысы – һуғышта кәрәкле оҫталығығыҙҙы арттырыу өсөн бөтә шарттар булдырыу. Бөгөн һеҙ үҙегеҙҙең хәрби бурысығыҙҙы үтәргә юлланаһығыҙ. Ғаиләләрегеҙ – ата-әсәләрегеҙ, ҡатындарығыҙ, балаларығыҙ өйҙә ҡала. Улар янында булырбыҙ тип вәғәҙә бирәм. Уларға һәр яҡлап ярҙам итәсәкбеҙ. Төбәктә дүрт яугирҙәргә һәм хәрби хеҙмәткәрҙәр ғаиләләренә ярҙам үҙәген астыҡ та инде. Республикабыҙ менән һеҙҙең хаҡта, туғандарығыҙ һәм яҡындарығыҙ тураһында хәстәрлек күрәсәкбеҙ. Хөрмәтле яугирҙәр! Һеҙ үҙ бурысығыҙҙы лайыҡлы үтәрһегеҙ һәм иҫән-һау әйләнеп ҡайтырһығыҙ тип ышанам. Ошонда һеҙҙе ҡаршы алырбыҙ. Эшләгеҙ, егеттәр. Рәсәй Геройы, запастағы генерал-майор Сергей Тулин яугирҙәргә изге теләктәрен еткерҙе. – Беҙгә һеҙҙең менән һалдаттың еңел булмаған өлөшө эләкте, сөнки һалдат – ул бөйөк исем, рядовойҙан генералға тиклем. Беҙҙең егеттәр махсус хәрби операция зонаһында хәрби бурыстарын намыҫ менән үтәй. Республикабыҙ яугирҙәрена хөрмәт һәм маҡтау, – тине Сергей Тулин. Батальон командиры яугирҙәр Тыуған илебеҙ һәм эшебеҙ өсөн ғүмерҙәрен ҡорбан иткән ата-бабаларыбыҙ иҫтәлеге өсөн көрәшәсәк, еңеү беҙҙең яҡта буласаҡ, дошман юҡ ителәсәк тип билдәләне. Миңлеғәле Ғөбәйҙуллин исемендәге батальонды оҙатыу тантанаһында Миәкә районы хакимиәте башлығы Ришат Аҡтуғанов та ҡатнашты. Ул тәьҫораттары менән уртаҡлашты. – Батальон ойошторолоуға бик ғорурмын, Миәкә районы хакимиәте башлығы ғына түгелмен, ә Миңлеғәле Ғөбәйҙуллиндың ауылдашы ла бит мин. Ул уҡыған мәктәптә уҡыным, уның партаһында ултырып ҡараным. Уларҙың үрнәгендә үҫтек. Бөгөн батальонда беҙҙең район егеттәре лә бар. Теләк бер – барыһы ла иҫән-һау ҡайтһындар, тыныслыҡта йәшәргә яҙһын. Бергәләп иҡтисадты күтәреп, аралашып, йәш быуынды бергә тәрбиәләргә яҙһын, – тине Миәкә районы хакимиәте башлығы Ришат Аҡтуғанов. Егеттәрҙең кәйефе көр. Дүртөйлө ҡалаһынан “Шаулин” позывнойлы егет менән аралаштыҡ. Уға 33 йәш, вахта менән себерҙә эшләгән икән. Тик дуҫтары-иптәштәре махсус хәрби операцияға киткәс, ул да барырға, ирлек бурысын үтәргә ҡарар иткән. – Аңлы рәүештә һайлаған юлым. Беҙ булмаһаҡ, кем? Дуҫтар, иптәштәр унда. Дошманды тар-мар итергә кәрәк. Өйҙә ата-әсәйем көтөп ҡала, дуҫтар, туғандар. Оҙаҡламай, еңеү менән ҡайтырбыҙ! – ти ул. “Коса” позывнойлы егетте дуҫтары оҙатып ҡалды. 27 йәшлек егет үҙенең ҡайҙан һәм кем икәнлеген әйтмәне, тик фекерҙәре менән ихлас уртаҡлашты. – Мин биш балалы ҙур ғаиләлә тыуып үҫкәнмен. Апай-ағайҙарымдың ике-өсәр балаһы бар. “Теге”ләрҙең һеҙҙең йорттарға киләсәкбеҙ, балаларығыҙҙы үлтерәсәкбеҙ, тигән һүҙҙәре ныҡ зитыма тейҙе. Юҡ, юл ҡуймаясаҡбыҙ! Мин тик патроитик хистәр менән китеп барам, – тине ул. Егеттәр, тиҙерәк иҫән-һау әйләнеп ҡайтығыҙ! Айрат Нурмөхәмәтов фотолары.