Һаулыҡ һаҡлау министрлығында онкология һәм онкогематология сирҙәренә дусар пациенттарға медицина ярҙамын камиллаштырыу мәсьәләһе ҡаралды. Һүҙ нигеҙҙә пациенттарҙың маршрутын грамоталы ойоштороу, диагностика сифатын яҡшыртыу, профиль буйынса өҫтәмә койкалар булдырыу, табиптар квалификацияһын күтәреү тураһында барҙы. Кәңәшмәлә Дәүләт Думаһы депутаты Римма Үтәшева һәм төрлө ведомство вәкилдәре ҡатнашты. Һаулыҡ һаҡлау министрлығының штаттан тыш баш белгесе, онколог Рөстәм Әйүпов республикалағы онкология хеҙмәте торошо менән таныштырҙы. Ведомствоның штаттан тыш баш белгесе, гематолог Айгөл Латипова республикалағы гематология хеҙмәте тураһында һөйләне. Шулай уҡ киң таралған ҡаты сирҙәр менән яфаланған пациенттарҙы, һөт биҙе яман шешенә дусар ауырыуҙарҙы дарыуҙар менән тәьмин итеү юлдарын яҡшыртыу мәсьәләләре ҡаралды. Республикала “Һаулыҡ һаҡлау” милли проектының ”Онкология сирҙәре менән көрәш” төбәк программаһы тормошҡа ашырыла. Шуға ярашлы, дауаханаларға 68 берәмек ҡорамал: компьютер томографияһы, магнит-резонанс томография аппараттары, нур терапияһы системаһы, эндовидеоскопия комплекстары һәм башҡа бик мөһим ҡорамалдар алынды. Рәсәй Президенты Владимир Путиндың “май” указдарына ярашлы, һаулыҡ һаҡлау тармағы алдында торған ошо бурыстарҙы тормошҡа ашырырға кәрәк: хеҙмәткә һәләтле йәштәге халыҡтың үлем күрһәткестәрен кәметеү, шулай уҡ яман шештәрҙән үлем күрһәткестәрен ( 100 мең кешегә 185 сир осрағына тиклем) аҙайтыу, сабыйҙар үлемен ҡыҫҡартыу (бер мең яңы тыуған сабыйға 4,5 промиллегә тиклем) һәм һәр кемдең тәүге медицина ярҙамынан файҙаланыу мөмкинлектәрен арттырыу. “Һаулыҡ һаҡлау” милли проектына (национальный проект “Здравоохранение”) ярашлы, инновациялы медицина технологияларын, шул иҫәптән, пациенттың сәләмәтлегенә иртә диагностика һәм дистанцион мониторинг системаһын индереү, тармаҡта берҙәм дәүләт мәғлүмәт системаһы нигеҙендә медицина ойошмаларының үҙ-ара берҙәм эшмәкәрлеге механизмдарын булдырыу – көн ҡаҙағындағы бурыстарҙың береһе. Фото: һаулыҡ һаҡлау министрлығы.