Өфө ҡалаһының "Торатау" конгресс-холында Бөтә Рәсәй "Ҡатын-ҡыҙ бәхете биләмәһе" Асыҡ академияһы сираттағы тапҡыр матур сара ойоштора. Белеүебеҙсә, Каринэ Владимировна Хәбированың башланғысы менән булдырылған был проект Башҡортостан Башлығы гранты нигеҙендә тормошҡа ашырыла. Бөгөнгө сарала Башҡортостан Башлығы Радий Хәбировтың ҡатнашыуы уның мәртәбәһен арттырҙы. Әйткәндәй, "Геройҙар ваҡыты" тигән "түңәрәк өҫтәл" үҙенә бик күптәрҙе йыйыуы уның юғары кимәле тураһында һөйләй ине. "Түңәрәк өҫтәл" артында һөйләшеүҙе "Ватанды һаҡлаусылар" төбәк фонды етәксеһе Гөлнур Ҡолһарина алып барҙы. Фойелағы хәрби кейемдәрҙән торған бай күргәҙмә менән танышырға мөмкин ине. Радий Хәбиров әйтеүенсә, беҙҙең республикабыҙҙан махсус хәрби операция биләмәһендәге һалдаттарҙың ҡайҙа булыуын улар белеп тора, даими рәүештә хәлдәрен белешә, ярҙамдан өҙмәй, һалдаттарҙың ғаиләләре лә иғтибар үҙәгендә. – Махсус хәрби операция биләмәһендә ҡатнашыусы яҡташтарыбыҙға даими гуманитар ярҙам оҙатыла, – тине Радий Хәбиров. – "Рәхмәт ярҙамығыҙ өсөн" тип һалдаттарыбыҙ шатлығын йәшермәй. Бөгөн ярҙамдың һәр төрө кәрәк. Был тәңгәлдә эштәрҙе артабан да дауам итәсәкбеҙ. Радий Хәбиров Рәсәй Президенты Владимир Путин тарафынан ойошторолған "Ватанды һаҡлаусылар" махсус хәрби операцияла ҡатнашҡандарға ярҙам итеү дәүләт фонды эшмәкәрлегенең мөһимлеген айырым билдәләне. "Ватанды һаҡлаусылар" махсус хәрби операцияла ҡатнашҡандарға ярҙам итеү дәүләт фонды рәйесе Анна Цивилева барыһын да видеобәйләнеш аша сәләмләне. Рәсәй Дәүләт Думаһы депутаты Эльвира Айытҡолова белдереүенсә, илебеҙҙең Рәсәй Президенты эргәһендә, махсус хәрби операцияла ҡатнашыусылар янында берләшеүе күп нәмә тураһында һөйләй. Эльвира Ринат ҡыҙы Асия апайҙың һалдаттарға бетеү тегеүен маҡтап телгә алды. Башҡортостан буйынса баш федераль инспектор Алексей Касьянов республикабыҙҙың һәр ваҡыт батырҙары менән дан тотоуына баҫым яһаны, махсус хәрби операцияла ҡатнашҡандарға ярҙам тураһында һөйләне, әсәйҙәрҙең, апайҙарҙың, ҡатындарҙың, ғөмүмән, гүзәл заттың иңендә мөһим бурыс ятыуын һыҙыҡ өҫтөнә алды, һәм һәр гүзәл затҡа ҡатын-ҡыҙ бәхете теләне. Республиканың ғаилә, хеҙмәт һәм халыҡты социаль яҡлау министры Ленара Иванова махсус хәрби операцияла ҡатнашыусыларҙың ғаиләләре һәм уларҙың ғаилә ағзалары өсөн 33 төрлө ярҙам саралары тураһында әйтеп үтте. Махсус хәрби операция биләмәһендә ғәзиз улдарын юғалтҡан әсәйҙәрҙе – Ольга Серафимованы, Айгөл Милләт ҡыҙын, Дилә Ғәлиулланы – тыныс күңел менән тыңлау мөмкин түгел ине. Ватаныбыҙ тыныслығы өсөн, Еңеүҙе тиҙерәк яҡынайтыу өсөн Рәсәй Геройҙары Максим Серафимов, Тамерлан Илһамов һәм башҡа яҡташтырыбыҙ яу яланында башын һалған. Сараны ойоштороусылар ҡаһарман улдар үҫтергән әсәләргә сабырлыҡ, ныҡлыҡ теләне. "Ҡатын-ҡыҙ бәхете биләмәһе" Асыҡ академияһы төрлө майҙансыҡтарҙа эшен дауам итә. Фото: Илдар Аҡъюлов.