Башҡортостанда сәсеү эштәре тамам

Ауыл хужалығы тармағында сәсеү тамамланып, һабантуйҙар миҙгеле бара. Хәҙер инде сәселгәнде юғалтыуһыҙ йыйып алыуға һәм ямғырҙарға өмөт итәбеҙ. Һуңғы осорҙа Рәсәй Хөкүмәтенең ауыл хужалығы тармағына иғтибарҙы арттырыуы юҡҡа түгел. Тәүге сиратта был санкцияларға бәйле. Ситтән индерелгән аҙыҡ-түлек урынына мөмкин тиклем үҙебеҙҙә күпләп етештереү маҡсаты ҡуйылғас, тармаҡ йәнләнде, сауҙа кәштәләрендә сит ил продукцияһын сифаты буйынса бер ҙә ҡайтыш булмаған үҙебеҙҙең тауарҙар алмаштырҙы. Тышҡы ауырлыҡтарға ҡарамаҫтан, ауыл хужалығында ҙур эштәр башҡарылды. Беҙҙең етештереүселәр тәьмин итеү сылбырын көйләне. Быйыл дәүләт программаһын тормошҡа ашырыуға 7 миллиард 263 миллион һум аҡса һәм программанан тыш тағы ла ярҙам бүленә, шуның 3,6 миллиард һумы — федераль бюджеттан. Республиканың агросәнәғәт комплексы һуңғы 20 йылда иң яҡшы һөҙөмтәләр күрһәтте. Тауар секто­рының өлөшө 63,7 процентҡа етте, ә “Ауыл хужалығы тауарҙарын етештереү индексы” дәүләт програм­маһының төп күрһәткесе 128,1 процентҡа тиклем артты. Ауыл хужалығы тауарҙары етештереү буйынса Башҡортостан Рәсәй Федерацияһында 11-се урынға күтәрелде. Башҡортостан Хөкүмәте Премьер-министры урынбаҫары – ауыл хужалығы министры Илшат Фәзрах­манов үҙенең сығышында билдәлә­үенсә, республиканың агросәнәғәт комплексы – дәүләт программаһы күрһәткестәрен үтәү буйынса Рәсәйҙә алдынғылар иҫәбендә. Мәҫәлән, үҫемлекселек индексы 164 процент тәшкил иткән (планға ярашлы, 152 процент булырға тейеш). Былтыр йыйылған иген күләме буйынса республика Рәсәйҙә туғыҙынсы урында. Шулай уҡ төбәк Рәсәйҙә теплицала үҫтерелгән йәшелсә күләме буйынса һигеҙенсе урында килә һәм һатылған йәшелсәнең 60 проценты үҙебеҙҙә етештерелгәнен дә билдәләге килә. Үҫемлекселек тармағы үҫешенең төп шарты, нисек кенә булмаһын, техниканы яңыртыуға барып тоташа. Былтыр 12,9 миллиард һумлыҡ 3200 берәмектән ашыу техника һатып алынған, республика бюджетынан ауыл хужалығы техникаһын һәм ҡорамалдарын һатып алыуға тотонолған сығымдарҙың бер өлөшөн ҡаплау өсөн 1 миллиард 27 миллион һум аҡса бүленгән. Һөҙөмтәлә тракторҙарға һәм комбайндарға көсөргәнеш кәмей, хәҙерге заман техникаһының етештереү күләме лә башҡаса. Баҫыуҙағы уңышты ул тиҙ һәм юғалтыуһыҙ йыйып алыуға булышлыҡ итә. Республикала малсылыҡ индексы 101,4 процент тәшкил итте, тине Илшат Фәзрахманов. Былтыр 760,2 мең тонна һөт етештерелгән, был 2021 йыл кимәленең 100,4 процентын тәшкил иткән. Ауыл хужалығы ойошмаларында һөт етештереүҙең уртаса күләме 6,5 процентҡа артыуы күҙәтелә. Бынан тыш, ауыл хужалығы тармағының инвестициялар йәлеп иткән иң әүҙем тармаҡтарҙың береһе булыуын да телгә алырға кәрәк. Былтыр 17,2 миллиард һумлыҡ инвестиция йәлеп ителгән, бөтәһе 111,3 миллиард һумлыҡ 64 өҫтөнлөклө инвестиция проекты әүҙем тормошҡа ашырыла. Төбәктә аҙыҡ-түлек етеш­тереү индексы ла артҡан һәм 103 процент тәшкил иткән. Рапс майы, ит консервалары, шәкәр, ярма, май етеш­тереүҙең үткән йылғы кимәл менән сағыштырғанда артыуы күҙәтелә. Был күр­һәткестәрҙең артыуы төбәк программаһына ярашлы дәүләт ярҙамының артыуына бәйле. Был күп кенә компанияларға ҡорамалдар һатып алыуға мөмкинлек аса. Крәҫтиән (фермер) хужалыҡтары ла дәүләт программаһы бурыстарын үтәүгә ҙур өлөш индерә. Улар иген, шәкәр сөгөлдөрө, йәшелсә, ит һәм һөт етештерә. Тармаҡта бәләкәй хужалыҡтарға ярҙам итеү программаларын тормошҡа ашырыу арҡаһында 28 яңы кооператив булдырылған һәм 140 хужалыҡҡа ярҙам күрһәтелгән. Дөйөм алғанда, былтыр бәләкәй эшҡыуарлыҡты үҫтереүгә 581 миллион һум дәүләт ярҙамы бүленгән. Быйыл ауыл хужалығы санкциялар ҡыҫымында эшләмәһә лә, сәсеү кампанияһын ҡатмарлы тәбиғәт шарттарында дәррәү үткәрҙе. Хәйер, ауырлыҡтар беҙҙе сыныҡтыра ғына. Мул уңышҡа өмөттө юғалтмайыҡ. - Лилиә НУРЕТДИНОВА