“Тренер гына түгел, дус булу мөһим”

Сер түгел, яшь кешегә балалар белән эшләү күпкә җиңел. Балалар бүген нәрсә белән кызыксына, үсмерләр нинди музыка тыңлый, ничек киенә, аларда нинди спорт төре аеруча кызыксыну уята — болар барысы да яшь укытучыга җиңелрәк бирелә. Укучылар да алар белән бер дулкында атлаган укытучыны якын күрә. Чыннан да, мондый укытучы белән рәхәтләнеп сөйләшеп тә, борчуларың белән бүлешеп тә була. Ул барысына да бүгенге күзлектән чыгып карый, яшь арасы зур булмаганлыктан, барысын да аңлый. Әле алай гына да түгел, шушы укытучы белән көн-төн ниндидер ярышларга әзерләнсәң, аннан җиңү белән дә кайтсаң — бу дуслык тагын да ныгый. Нуриман районының Красная Горка мәктәбе тренеры Илнур Гайсинны да укучылары нәкъ шулай үз итә.Яшь укытучы 1994 елда Кыйгы районында туган. М. Акмулла исемендәге Башкорт дәүләт педагогия университетының физкультура бүлеген тәмамлагач, 2017 елда ул шушы районга күченеп килә. Тәүдә ул физкультура-савыктыру комплексына эшкә урнаша. Биредә мәктәп укучыларыннан өч төркем булдыра. Укучылар әле яңа гына укуын тәмамлаган тренер җитәкләгән баскетбол түгәрәгенә бик теләп йөри башлый. 2021 елда ул мәктәпкә эшкә күчә. Билгеле инде, яшь, чибәр егет тиз арада шушы районда үскән кыз белән гаилә кора. Бүген ул тормыш иптәше белән кечкенә кызлары Эмилияне тәрбияли.– Бу якларда туып-үсмәсәм дә, урындагы халык мине тиз арада үз итте. Балалар белән эшләргә яраткач, аларның әти-әниләре белән дә уртак тел таптым, – ди Илнур Илгиз улы.Бөтен күңелеңне биреп эшләгәч, югары нәтиҗәләр дә озак көттерми. Бүген инде Илнур Гайсин районда гына түгел, республикада алдынгы тренер­ларның берсе. Быел, мәсәлән, республика чемпионатында кызлар командасы беренче урынны яулаган. Узган җәй республикада үткән урам баскетболы ярышларында ике тапкыр 2нче урынга лаек булганнар. Шунда ук егетләр дә 3нче урын алган. Нәтиҗәдә, авыл командалары арасында – 1нче, шәһәр командалары арасында 2нче урынга чыкканнар. Гомумән, әлеге тренер җитәкләгән командаларның җиңүләрен санап бетергесез.– Баскетбол белән 5нче сыйныфта укыганда шөгыльләнә башладым. Ә спортка үземне белгәннән алып гашыйк мин. Кечкенәдән спорт белән шөгыльләнгәч, һөнәр сайлау турында озак уйламадым. Үз алдыма Башкортстан чемпионы булу максатын куйдым. 2013 елда ук инде мин әзерләгән команда урам баскетболы буенча шушы зур исемгә лаек булды. Шунда ук берничә тапкыр республика дәрәҗәсендә үткән ярышларда призлы урыннар алдык.Әлбәттә, мондый уңышларга ирешү өчен зур тырышлык таләп итә. Тәү чиратта балаларны җиңү яулый алуыбызга ышандырырга кирәк. Алар үз көченә ышанырга тиеш. Билгеле, безгә каршы уйнаган командалар да мондый ярышларга зур әзерлек белән килә. Балалар шундый вакытта куркып калмаска тиеш. Спортчы һәрвакыт мотивацияне тренерыннан ала. Әгәр тренер алар алдына дөрес бурыч куя икән – бу инде уңышка ирешү өчен зур адым. Шул ук вакытта, алар башка командалар белән дә даими ярышып торырга, ягъни, төрле хәлләрдә дә югалып калмаска тиеш. Монда физик әзерләк белән беррәттән, уенчының эчке халәте зур роль уйный. Шуңа күрә укучылардан нәрсәдер таләп итү генә түгел, аларга таяныч та, дус та, киңәшче дә булу мөһим, – ди ул.Илнур бүген дә үз алдына зур максатлар куеп, аларга ирешү өчен зур көч сала. Теләге – Идел буе федераль округында үткән ярышларга чыгу. Июньдә алар кызлар командасы белән Түбән Новгородта Башкортстан исемен яклаячак.– Спорт белән шөгыльләнгән балалар чыдам, үз-үзенә ышанган була. Шушы җиңү яулаган кызлар да тиздән мәктәп тәмамлаячак. Әлеге уңышлары аларга укырга кергәндә дә берникадәр ярдәм итәчәк. Билгеле, бу кызларга БДИга да әзерләнергә кирәк. Шуңа да без күбрәк ял көннәрендә җыелабыз, – ди ул.Әлеге командадан тыш, Илнур Илгиз улының 2нче һәм 5-6нчы сыйныф укучыларыннан торган командалары да бар. Алар да, өлкән сыйныфта укыган дуслары кебек, җиң сызганып шушы спорт төре белән шөгыльләнә. Әмма шунысы көн кебек ачык, шушы яшьтән үк спорт белән дус һәм янәшәңдә һәрвакыт таяныч булырдай укытучың бар икән –уңышка ирешү дә кыен булмаячак.