Шәмбе, 10 июндә, Салауат районында башҡорт халҡының милли геройы Салауат Юлаевтың тыуыуына 269 йыл тулыуға арналған “Салауат йыйыны” ҙур республика фольклор байрамы үтә. Йыл да ойошторолған матур байрам бер майҙанда бар республиканың ижади коллективтарын берләштерә. Тамашасыларҙы йыр-бейеү, халыҡ уйындары һәм конкурстар менән тулы сағыу программа көтә. Байрамда художестволы үҙешмәкәрлек ижади конкурстары, традицион халыҡ һәм милли спорт төрҙәре буйынса ярыштар үтәсәк. “Беҙ – Салауат тоҡомо” республика бәйгеһе планлаштырылған, унда егеттәр араһында “Салауат батыры” һәм ҡыҙҙар араһында “Йөҙөк ҡашы – Зөләйха” конкурстары уҙа. Оҫталар, рәссамдар һәм ижади коллективтар Салауат Юлаев исеме менән бәйле иң яҡшы сувенир продукцияһына “Оран” республика конкурсында ҡатнаша. Ә мәҙәниәт учреждениелары белгестәре араһында “Ялҡын” асыҡ вокал сәнғәте конкурсы 18 - 45 йәшлек яңғыҙ башҡарыусыларҙы, дуэттарҙы, триоларҙы йыя. Республика райондары һәм ҡалалары командалары башҡорт күпбәйгеһе буйынса “Салауат бәйгеһе” асыҡ турнирында ҡатнаша ала. Сара йәш быуында үҙ халҡына, тарихи үткәндәргә һөйөү, милли ғорурлыҡ тойғоһо тәрбиәләүгә йүнәлтелгән. Байрамды Башҡортостандың Мәҙәниәт министрлығы, Республика халыҡ ижады үҙәге, Салауат районы хакимиәте, Girzamusic продюсерлыҡ үҙәге ойоштора. Фото: "Бәйләнештә".