2023 йылдың икенсе яртыһына гәзит-журналдарға яҙылыуҙың ҡыҙған мәле. Етмәһә, әле ташламалы хаҡҡа яҙылыу иғлан ителгән. Ваҡытлы матбуғатҡа яҙылыу мәлендә һәр саҡ Лилиә Вәлиәхмәт ҡыҙы Нафиҡованы иҫкә алам. Ул: “Рәмилә, һин урындамы? Хәҙер киләм”, – тип шылтыратып, мөхәрририәткә йылмайып килеп тә инә һәм гәзиткә яҙыла. Бына ҡайҙа ул илһөйәрлек! Әле лә ошо Лилиә апай кеүек башҡа милләттәштәребеҙ ҙә әүҙем булһын ине, тип теләйбеҙ. Ысынлап та, Лилиә апайҙы йәштәргә өлгө итеп ҡуйырлыҡ, балаларын да рухлы итеп тәрбиәләгән. Быйыл мартта 85 йәшен билдәләгән апайыбыҙ Өфө ҡалаһының ижади тормошонда ҡайнап йәшәй, төрлө сараларҙа әүҙем ҡатнаша, концерттарға, театрҙарға йөрөй. Лилиә Вәлиәхмәт ҡыҙы 1938 йылдың 10 мартында Учалы районының Мулдаш ауылында тыуған. 1961 йылда Мулдаш һигеҙ йыллыҡ мәктәбен тамамлағас, Өфө медицина училищеһына уҡырға инә. 1965 йылда училищены тамамлағас, Учалы районында хеҙмәт юлын башлай. Хаҡлы ялға сыҡҡанға тиклем тыуған ауылында фельдшер булып эшләй. Хеҙмәт ветераны. Район, ауыл, йәмәғәт эштәрендә әүҙем ҡатнашып йәшәгән, төрлө йылдарҙа комсомол ойошмаһы етәксеһе, ҡатын-ҡыҙҙар советы рәйесе ла була. Тормош иптәше иртә вафат булғас, дүрт балаһын яңғыҙы тәрбиәләп үҫтерә. Балаларының һәр ҡайһыһының юғары белеме, яратҡан эштәре, үҙ ғаиләләре, бала-сағалары бар. Лилиә Нафиҡова һуңғы йылдарҙа Өфөлә йәшәй, ейән-ейәнсәрҙәрен тәрбиәләшә. Баш ҡалалағы мәҙәниәт усаҡтарында эшләп килгән ижади төркөмдәргә - “Өфө хәтирәләре” фольклор ансамбленә, “Өләсәйҙәр һандығы” һәм “Селтәр” студияһына йөрөй. “Ҡатын-ҡыҙ – милләт әсәһе” конкурсында ла ҡатнашты. Лилиә апай кеүек оло быуындан өлгө алайыҡ, милли баҫмаларға яҙылып, үҙебеҙҙең илһөйәрлегебеҙҙе башҡаларға күрһәтәйек. Беҙ бергә булғанда ғына, көслө була алабыҙ. Автор фотоһы.