Бөгөн Өфөлә яңғырауыҡлы енәйәт эшенә нөктә ҡуйылды. Республиканың элекке ике министрына ҡарата хөкөм ҡарары сығарылды. Ленин районы суды элекке торлаҡ-коммуналь хужалыҡ министры Борис Беляев менән төҙөлөш һәм архитектура министры Рәмзил Күсәрбаевҡа ҡарата суд ҡарарын иғлан итте. Уларҙың икеһе лә алтышар йыл дөйөм режимлы колонияға ултырасаҡ. Шулай уҡ, республика прокуратураһының матбуғат хеҙмәте хәбәр итеүенсә, енәйәт эше фигуранттары: Башҡортостандың Капиталь төҙөлөш идаралығы начальнигы урынбаҫары Рәмил Сафин, республика 2-се капиталь төҙөлөш бүлеге башлығы Шадморат Бикембәтов, Күмертау ҡалаһы мэры урынбаҫары Юрий Куровҡа хөкөм ҡарары сығарылды. Барыһы ла “Ауыр эҙемтәләргә килтергән вазифа вәкәләттәрен саманан тыш файҙаланыу” һәм “Хеҙмәт ялғаны” статьялары буйынса ғәйепле тип танылды. Судта билдәләүҙәренсә, 2017 йылдың июненән сентябренә тиклем Күсәрбаев, республиканың Капиталь төҙөлөш идаралығы башлығы булған саҡта, уның урынбаҫары Сафин, Бикембәтов һәм Күмертау мэры урынбаҫары Юрий Куров, Күмертау ҡалаһы ҡала округының Маячный ауылындағы таҙартыу ҡоролмаһында һәм канализация коллекторынд көйләү эштәре башҡарылмағанын һәм үҙенең тура тәғәйенләнеше буйынса файҙаланыла алмағанын белә тороп, эштәрҙе ҡабул иткән. Ул саҡтағы муниципалитет башлығы Беляев объекттың етештереүсәнлеге һәм эшкә һәләтлелеге хаҡында ялған мәғлүмәттәр була тороп, уға тапшырылған документтарҙы раҫлаған. Әйткәндәй, “Моноҡалаларҙы үҫтереү фонды” бюджетынан һәм республика ҡаҙнаһынан ҡоролманы төҙөүгә 95 миллион һумдан ашыу аҡса бүленгән. Артабан Куровтың күрһәтмәһе буйынса, Күмертау мэры ризалығы менән, баш архитектор объектты файҙаланыуға тапшырыуға рөхсәт биргән. Ғәйепләнеүселәр үҙ ғәйебен таныманы. Суд Күсәрбаев менән Беляевты дәүләт органдарында 2,5 йылға эшләүҙе тыйып, алты йылға дөйөм режимлы колонияға оҙатты. Башҡа чиновниктарға өс йыл да дүрт айҙан биш йылға тиклем дөйөм режимлы колония тәғәйенләнде һәм дәүләт учреждениеларында 2,5 йыл буйына вазифалар биләүҙе тыйҙы. Әйткәндәй, министрҙарҙың адвокаттары суд ҡарары менән риза түгел, һәм ялыу бирәсәк. Фото: социаль селтәрҙәр.