Грант алып, үҙенең хужалығын үҫтереп, етештереү кимәлен арттырған эшҡыуарҙарҙың береһе - Әлшәй районының Слаҡ ауылында йәшәгән Әлфиә Ғәниева. Ғәниевтәрҙең хужалығы боронғоса итеп милли эсемлек етештереүе менән билдәле. Тап шуның өсөн дә Әлфиә Ғәниева етештергән ҡымыҙҙың даны бөтөн республикаға таралған. Крәҫтиән (фермер) хужалығын бөтмөр Ғәниевтәр 15 йыл элек булдырып ебәрә. Ҡымыҙҙарының сифаты менән һатып алыусыларҙың ышанысын шунда уҡ яулай. Төрлө республика ярыштарында еңеүҙәре менән дә был исемде раҫлап тора. — Беҙҙең ҡымыҙға һәр ваҡыт ихтыяж булды. Уны етәрлек кимәлдә етештереү мәсьәләһе килеп тыуҙы. Шуға ла етештереү күләмен арттырыу тураһында уйланыҡ. 2021 йылда "Агростартап" грант программаһында ҡатнашырға булдыҡ. Конкурста еңеп сыҡтыҡ һәм 2,7 миллион һум оттоҡ, ошо аҡсаға башҡорт тоҡомло 10 ат, трактор, йөк тейәүсе һатып алдыҡ. Дәүләт ярҙамы бик урынлы булды. Мал аҙығы культураларын үҫтереү өсөн үҙебеҙҙең ауыл хужалығы техникаһын һатып ала алдыҡ, ҡымыҙ етештереүҙе арттырҙыҡ. Бөгөн Ғәниевтәрҙең хужалығында 100-ҙән ашыу башҡорт тоҡомло ат бар, шуларҙың 26-һы - һауын бейә. Көн һайын 220 литр ҡымыҙ етештерәләр. 70 гектар ерҙә мал аҙығы әҙерләү өсөн иген культуралары сәсәләр, бесән әҙерләйҙәр. «Агростартап» гранты «Кесе һәм урта эшҡыуарлыҡҡа ярҙам итеү» төбәк проекты сиктәрендә бирелә. Был сараларҙың барыһы ла Рәсәй Президенты Владимир Путиндың май указына ярашлы булдырылған “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү" (национальный проект "Малое и среднее предпринимательство и поддержка индивидуальной предпринимательской инициативы") милли проектына ярашлы атҡарыла. 2023 йылда "Агростартап" грантына Башҡортостанда 24 эшҡыуар һайлап алына. Төбәктә программа буйынса дәүләт ярҙамының дөйөм суммаһы 97,7 миллион һум тәшкил итә. Фото һәм мәғлүмәт сығанағы: Башҡортостандың Ауыл хужалығы министрлығы.