Киләсәгебеҙ бар, һәм ул шундай уҡ йөкмәткеле, матур буласаҡ!

Кисәге көн халҡыбыҙ менән, милли батырыбыҙ Салауат Юлай улының 269 йәшлек тыуған көнөн билдәләнек. Республика буйынса был көндө ниндәй генә саралар уҙманы. Әлбиттә, улар араһында балалар өсөн уҙғарылған байрамдар ҙур әһәмиәткә эйә. Шулай уҡ был көн Башҡарма комитет Бөтә донъя башҡорттары ҡоролтайы янындағы республика башҡорт ата-әсәләре комиссияһы менән “Аҡбуҙат” журналы уҙғарған Салауат Юлаевтың һәм уға бағышланған шиғырҙар бәйгеһе лә мәртәбәле бер күренеш булды. Бәйге ике төрҙә үтә ине, беренсеһе - республика һәм унан ситтә йәшәгән балалар өсөн, интернет селтәрендә, республика ата-әсәләр комиссияһының “Бәйләнештә” сайтындағы төркөмөндә. Ә инде баш ҡалабыҙҙа һәм Салауат ҡалаһында йәшәгән балалар өсөн бәйге милли батырыбыҙҙың һәйкәле янында уҙғарылды. Был мәртәбәле сараны ойоштороусыларҙың береһе Айгөл Атанова: “Милли батырыбыҙҙың тыуған көнө айҡанлы уҙғарылған бәйгелә шиғыр һөйләүселәр генә түгел, йәш ҡурайсылар ҙа ҡатнашты. Был сараның маҡсаты - балаларыбыҙҙа милли батырыбыҙҙың рухын һаҡлау, уларға арҙаҡлы шәхесебеҙ арҡылы туған телгә, илебеҙгә, милли мәҙәниәтебеҙгә, тарихыбыҙға һөйөү һалыу", – тине. Халҡыбыҙҙың ниндәй милли байрамы изге ҡурайһыҙ үтһен инде! Байрамды асып, ҡурайсылар Ринат Рамаҙанов, Мирас Үҙәнбаев, Айҙар Байтимеров һәм уның уҡыусылары Асҡар Йомағолов, Шамил Дибаев, Тимур Дәүләткирәйев “Урал” көйөн башҡарҙы. Байрам тантаналы асылғандан һуң, тарихсы, Бөтә донъя башҡорттары ҡоролтайының Башҡарма комитеты ағзаһы Сәлмән Ярмуллин: “Һәр милләт үҙенең тамырҙары менән көслө. Беҙҙең Салауатыбыҙ ул – тарихыбыҙҙың алтын бағаналарының береһе. Ул – тарихсы ла, шағир ҙа, яугир ҙә. Һәр ваҡыт беҙҙе рухландырып тора. Ул – беҙҙең үткәнебеҙ ҙә, киләсәгебеҙ ҙә. Бына бөгөн байрамға күп кенә балаларыбыҙ килгән, улар араһында, бәлки, милләтебеҙҙе, республикабыҙҙы үргә әйҙәгән Салауат Юлаев рухлы егеттәр үҫеп киләлер...” – тип кескәй милләттәштәребеҙҙе байрам менән тәбрикләп үтте. Әйткәндәй, шиғыр бәйгеһенә кескәйҙәр ҙур яуаплылыҡ менән әҙерләнеп килгән. Батырыбыҙ хаҡындағы һәм уның үҙенең шиғырҙарын йөрәккә үткәреп, ихлас итеп һөйләнеләр. Шуға ла, уларҙың һәр береһенә еңеүсе исемен биреү ҙә яҙыҡ булмаҫ ине. Әммә, бәйге булғас, уның еңеүсеһе лә була тигәндәй, беренсе урын ике бәйгесе, Асҡар Ғатауллин менән Әминә Билаловаға бирелде. Балаларҙы ҡотлап, “Башҡортостан уҡытыусыһы” журналының баш мөхәррире, Салауат Юлаев ордены кавалеры, яҙыусы Салауат Кәримов: “Бөгөн беҙ милли батырыбыҙға килеп хөрмәт күрһәтеп, уны хәтерләп, баш эйеп, халҡыбыҙ тарихын иҫкә төшөрәбеҙ икән, беҙҙең ғаиләләрҙә ошондай тәрбиә бирелеп, батырҙар тураһында, туған тел тураһында, үҙебеҙҙең телдә һөйләшеп, балаларыбыҙға үҙебеҙҙең ғөрөф-ғәҙәттәребеҙҙе өйрәтәбеҙ икән, тимәк, киләсәгебеҙ бар, һәм ул шундай уҡ йөкмәткеле, матур буласаҡ!” – тип белдерҙе. Салауат Ғайса улы үҙенең махсус бүләген дә тапшырып үтте. Әйткәндәй, был байрамды ойоштороусыларҙың береһе, “Аҡбуҙат” журналының баш мөхәррире Лариса Абдуллина ла кескәй дуҫтарыбыҙға журналдың махсус приздарын тапшырып сыҡты. Балалар һәм уларҙың ата-әсәләре бындай күңел байрамынан ҡыуанып, рухланып, киләсәктә лә халҡыбыҙ мәнфәғәтенә янып йәшәү теләге менән ҡайтҡанына иманым камил! Салауат Юлаев кеүек бөйөк батырҙар халҡыбыҙға юҡҡа бирелмәгән бит, үҙебеҙҙең дәрәжәбеҙҙең билдәһе булған батырыбыҙға ҡарарға һәм дә уйланырға урын бар. Был йәһәттән арҙаҡлы шәхестәребеҙ ҙә, Бөтә донъя башҡорттары ҡоролтайы Башҡарма комитеты, Республика башҡорт ата-әсәләр комиссияһы, “Аҡбуҙат” журналы кеүек милли ойошмаларыбыҙ ҙур эштәр башҡара! Фотолар: автор фотолары.