Шәфҡәт туташы һөнәренең бик кәрәкле, әммә шул уҡ ваҡытта ауыр ҙа, яуаплы ла икәнлеге хаҡында яҡшы беләбеҙ. Өҫтәүенә, уларға тажзәхмәт кеүек заман сирҙәре менән көрәшергә, шул уҡ ваҡытта төрлө хәлдәр менән осрашырға һәм төрлө холоҡло кешеләр менән эшләргә тура килә. Улар ихласлығы, шәфҡәтле уйҙары менән сирлеләр күңеленә туранан-тура юл һала. "Башҡортостан" гәзитенең "Бәйләнештә" төркөмөндә барған конкурста ҡатнашҡан Резеда Әсләм ҡыҙы Усманова – Өфө ҡалаһындағы 5-се ҡала клиник дауаханаһында участка шәфҡәт туташы. Ул 1999 йылда Белорет медицина колледжын “Акушерлыҡ эше” белгеслеге буйынса тамамлаған. 2003 йылға тиклем – фельдшер-акушерлыҡ пункты мөдире, артабан баш ҡалалағы 1-се поликлиникала – дөйөм практика шәфҡәт туташы, артабан 2016 йылда 5-се ҡала клиник дауаханаһында участка шәфҡәт туташы булып эшләй. Шуныһы үҙенсәлекле: уның ҡыҙы Лиана ла шәфҡәт туташы. Улы Никитаға иһә дүрт йәш. Резеда Әсләм ҡыҙы өсөн эшеңде ерен еткереп атҡарыу, яуаплылыҡ, теүәллек, ихласлыҡ кеүек сифаттар хас, шуға ла уға пациенттар менән уртаҡ тел табыуы ауыр түгел. Өҫтәүенә, ул ковид-госпиталдә лә беренсе көндәрҙән үк эшләне. Егәрле шәфҡәт туташының хеҙмәте Өфө ҡалаһы Совет районы хакимиәтенең маҡтау грамотаһы менән баһаланған. Резеда Усманова сәнғәтебеҙгә, мәҙәниәтебеҙгә ғашиҡ. Уның йырлауында һәр йыр үҙенә күрә яңы бер балҡыш таба: оҙон халыҡ һәм заманса йырҙарҙы ла шул тиклем оҫта башҡара ул. Тиккә генә һәләтле кеше һәр йәһәттән һәләтле, тимәйҙәрҙер. Резеда Әсләм ҡыҙы өсөн тауыш бирәйек, дуҫтар, лайктар ҡуяйыҡ, изге теләктәребеҙҙе юллап, комментарийҙар яҙайыҡ. Фотолар: Резеда Усманованың шәхси архивынан.