Ҡайһы саҡта сәхнәлә башҡарылған йыр, күңелдәрҙе тетрәндереп, йөрәктәрҙе һағышландырып үтеп ингәндән һуң, уны кем ижад иткәнен белгәс, аптырап ҡалаһың. Баймаҡ ҡалаһында йәшәгән һәүәҫкәр композитор, шағир Борис Хәйретдиновтың һәр йырын тыңлаған тамашасы был һүҙҙәр менән килешер, моғайын. Ысынлап та, ябай моң эйәһенең күп яҡлы таланты һоҡланырлыҡ та шул! Башҡортостандың атҡаҙанған мәҙәниәт хеҙмәткәре, Рәсәй, республика конкурстары һәм Батыр Вәлид исемендәге премия лауреаты, тарихсы, һәүәҫкәр композитор, шағир, сәсән, “Йәнгүҙәй” әҙәби-ижад берекмәһе ағзаһын Баймаҡ районында оҫта баянсы, тәжрибәле уҡытыусы, остаз, тыуған яҡты өйрәнеүсе булараҡ та яҡшы беләләр. Күп мәҙәни сараларҙа ул үҙенең баянында сығыш яһай, матур итеп йырлай ҙа. Борис Мөхәмәт улы ижад иткән йырҙарҙы Фәрүәз Урманшин, Резеда Әминева, Рәмил Туйсин, Әлфир Заманов һәм башҡа йырсылар яратып башҡара. Бигерәк тә уның “Ал мине лә”, “Ғүмер”, “Туған тел”, “Әсәйемә” тигән йырҙары бик күп популяр йырсыларҙың репертуарына ингән. Һуңғы ваҡытта авторҙың көй-моңдарын төрлө йырсылар башҡарыуында радио тулҡындарында ла йыш ишетергә мөмкин. Борис Хәйретдинов 1948 йылда Баймаҡ районының Икенсе Этҡол ауылында донъяға килгән. Сибай педагогия училищеһында музыка һәм башланғыс кластар уҡытыусыһы дипломын алғас, хеҙмәт юлын тыуған ауылында музыка уҡытыусыһы булып башлай. Әрме хеҙмәтенән ҡайтҡас та белем усағында эшен дауам итә. “Урал” колхозының комсомол секретары, клубтың художество етәксеһе, ауыл советы рәйесе була, ситтән тороп Башҡорт дәүләт университетының тарих факультетын тамамлай. Тап студент йылдарында тыуған яғының тарихын, ер-һыу атамаларын өйрәнә, уларҙы һаҡлап ҡалыуға, яҙып алыуға һәм мәңгеләштереүгә ҙур өлөш индерә. Төрлө йылдарҙа Борис Хәйретдинов Икенсе Этҡол, Татлыбай, Ишбирҙе урта мәктәптәре директоры, “Сибай” совхозының эшселәр комитеты рәйесе, Баймаҡ леспромхозының партия комитеты секретары була. Баймаҡ ҡалаһына күсеп килгәс, байтаҡ йылдар Баймаҡ лицей-интернатында, артабан ҡаланың яңы асылған 4-се мәктәбендә йыр һәм тарих уҡытыусыһы булып эшләп, хаҡлы ялға сыға һәм, ниһайәт, ижад эшенә ныҡлап тотона. Күңелендә йыр булып урғылған көйҙәрен яҙырға, уларҙы бергә туплап, йыр-моң һөйөүселәр, балалар баҡсаһы һәм музыка уҡытыусылары өсөн “Һиңә йырым, тыуған ерем” тип аталған йыйынтыҡ әҙерләп сығара. Йыйынтыҡта авторҙың 60 йыры ноталар менән бирелгән. Шул уҡ ваҡытта мөнәжәт, ҡобайырҙар ижад итә, тыуған яғының матур тәбиғәтенә арналған шиғырҙар яҙа. Тыуған яҡты өйрәнеүсе Ирек Бикмәтов менән берлектә “Ниғәмәт ауыл биләмәһе тарихы” тип аталған ике китап сығара. Шулай уҡ проза һәм шиғриәт өлкәһендә уңышлы эшләй, уның әҫәрҙәре “Ағиҙел” журналында даими баҫылып тора. Үҙнәшер юлы менән “Ете лә генә ырыу, береһе – Бөрйән”, “Ынтылыш” романдары, “Ғүмерем биҙәктәре” шиғырҙар, ҡобайырҙар йыйынтығы һәм башҡа китаптары донъя күргән. Һуңғы ваҡытта автор дини темаға бәйле яҙмалар ижад итә, йәш быуынға иман, дин тураһында үҙенең белгәндәрен өйрәтә. Баймаҡ районында бер сара ла Борис Хәйретдиновһыҙ үтмәй, бигерәк тә ул уйнаған баян моңдарын олоһо ла, кесеһе лә ярата. Район һәм ҡаланың йәмәғәт эштәрендә әүҙем ҡатнаша, Баймаҡ аҡһаҡалдарының “Атайсал” ҡоро рәйесе, райондың тыуған яҡты өйрәнгән тарихсылар ойошмаһы рәйесе урынбаҫары, Рәйес Түләков исемендәге “Йәнгүҙәй” әҙәби-ижад берекмәһе ағзаһы Борис Мәхәмәт улы күптән түгел күркәм юбилейын билдәләне. Ҡулынан баяны төшмәгән, күңеленән һәр саҡ йыр-моң урғылған, йөрәге һәр саҡ егеттәрсә типкән Баймаҡ аҡһаҡалына артабан да ижади уңыштар, һаулыҡ юлдаш булһын, ҡатыны Рәсимә Шәһит ҡыҙы менән киләсәктә лә йырлы-моңло тормошта йәшәргә яҙһын! - К. ИШБУЛДИНА Баймаҡ ҡалаһы