Егеттәр сәләм һәм рәхмәт әйтте

“Алты меңдән ашыу саҡрым юл артта ҡалды. Ике “КамАЗ”ға шыплап тейәлгән гуманитар ярҙам тәғәйен урынға барып етте. Яҡташ яугирҙәрҙе күреү өсөн алғы һыҙыҡҡа тиклем индек. Егеттәр сәләм еткерҙе һәм рәхмәт һүҙҙәре әйтеп ҡалды...” Ошолай тип бәйән итте Стәрле­тамаҡ ҡалаһы хакимиәте башлығы Рөстәм Ғәзизов. Ҡала етәксеһе коллегалары менән Донецк һәм Луганск халыҡ республикаларында, Запорожье һәм Херсон өлкәләрендә командировкала булды. Рөстәм Фәрит улы шулай уҡ яҡташтар һораған әйберҙәрҙең барыһының да алып барылған­лығы һәм шулай уҡ уларҙың яҡындарынан да күстәнәстәр, кәрәк-яраҡ, хаттар ҡулдарына тотторолғанлығы тураһында хәбәр итте. Был хәбәр һалдаттарҙың яҡындары өсөн, әлбиттә, бик тә мөһим һәм күңелдәрен тынысландыра. Яугирҙәребеҙгә тепловизорҙар, квадрокоптерҙар, яғыулыҡ менән эшләй торған бысҡы, дарыу-витаминдар, аҙыҡ-түлек, һыу өсөн ҙур һауыттар, эш ҡоралдары, хатта ике “УАЗ” автомобиле һәм башҡа кәрәк-яраҡ алып барылған. Был кәрәкле әйберҙәр хаҡында, әйткәндәй, яҡташтарыбыҙ ялға ҡайтҡан мәлдә Рөстәм Ғәзизов менән осрашыуҙа һөйләгәйне. Үтенес тулыһынса ҡәнәғәтләнде­релде – Стәрлетамаҡ яугирҙәре­нең ихтыяжы һәр саҡ ошолай, ваҡ-төйәккә тиклем, үтәлә бара. – Махсус хәрби операцияла ҡатнашыусыларға һәм уларҙың ғаиләләренә ярҙам итеү үҙәгенә, яугирҙәрҙең яҡындарына, ҡала предприятиеларына, бигерәк тә Башҡортостан сода компания­һына, ғөмүмән, Стәрлетамаҡ халҡына ошондай ҙур гуманитар ылау йыйыуҙа һалған көс өсөн ҙур рәхмәт! – тип тә билдәләне ҡала мэры. Рөстәм Ғәзизов гуманитар ярҙам тапшырған мәлдә һалдат­тар менән аралашырға ла өлгөр­гән, тағы ниндәй ярҙам кәрәк, ғаиләләренә нимәләр әйтергә – ошоға бәйле хәлдәрен дә һораш­ҡан. Рөстәм Фәрит улы хатта окоптар буйлап та йөрөп алған. Әйткәндәй, ҡала етәксеһенең ҡаһарман яҡташтар менән бындай яҡын аралашыуы тәүгә түгел – ул инде бер нисә ылауҙы оҙата барҙы, шул иҫәптән алғы һыҙыҡҡа тиклем. Бынан тыш, ҡалала ла махсус операцияла ҡатнашыусы­лар һәм уларҙың ғаиләләре менән йыш осрашып тора. – Егеттәребеҙ бирешмәй. Рухтары ныҡ. Ышаныслы рәүештә еңеү өсөн алышалар. Көнкүреш­тәре менән дә танышырға форсат сыҡты: барыһы ла бар, уңайлы, – тип һөйләне Рөстәм Фәрит улы яугирҙәрҙең көндәлеге хаҡында. ...Алты мең саҡрым артта ҡалды. Гуманитар ярҙам барып етте. Инде махсус хәрби операция тиҙерәк маҡсатына өлгәшһен, яҡташтарынан барған кәрәк-яраҡ, сәләмдәр, доғалар егеттәребеҙҙең еңеүгә өлгәшеүенә ныҡлы таяныс булһын! Рәмил МАНСУРОВ