Донбасста махсус хәрби операция башлангач та илебез халкы анда катнашучыларга ярдәм күрсәтүгә актив кушылды: яугирләребез өчен көнкүрештә кирәк булырдай шәхси кием-салым, әйберләр җыеп озатудан, укучы балалар тарафыннан туган як сәламе белән сугарылган хатлар язудан башлап, төрле техника камилләштерелде, сугыш шартларына яраклаштырылды, окоп шәмнәре, күчмә мунчалар ясалды, маскировка челтәрләре үрелде, акча җыеп, аларга тепловизорлар, квадрокоптерлар, башка нәрсәләр сатып алынды.Караидел районы халкының да бу изге эштә күмәк катнашуы, малтабарлар тарафыннан төрле акцияләр оештырылып, республикадан гуманитар конвой җыюга зур өлеш кертүе турында гәзитебездә дә язып чыккан идек, бу хакта район хакимияте башлыгы Айдар Шәйдуллин белән тәкъдим ителгән интервьюда да телгә алынды.Районга соңгы тапкыр баруымда Мәдәният сарае директоры, район Советы депутаты Мирза Хөсәенов мине бик үзенчәлекле шәхес, милләтпәрвәр дин әһеле, 74 яшьлек мөәзин Наил ага Гайнетдинов белән таныштырды. Һәм, чыннан да, диндар абзабыз игътибарга лаек кеше булып чыкты: изге Рамазан аенда, Наил аганың әлеге акчаларга махсус хәрби операциядә катнашучылар өчен әйберләр сатып алырга җыенуын ишетеп, кайбер кешеләр аңа хәерлекләр китергән, бу суммага Наил Нәбиулла улы шәхсән үзенә китерелгән фитыр сәдакаларын да өстәгән. Шулай итеп, якынча 17 мең сум җыелып киткән. – Мин үзем шушы районнан, Яңа Акбүләк авылыннан. Уфадагы Мәрьям Солтанова исемендәге мәдрәсәне тәмамладым, – дип таныштырды Наил Нәбиулла улы үзе белән. – Бер намазны да калдырмыйм, мөәзин буларак, Караидел авылындагы мәчеттә еш кына азан әйтәм. Күңел кушуы буенча халыкка дини йолалар үтәргә, үткәрергә ярдәм итәм. Ә хәрби операциядә катнашучы якташларыма ярдәм итү теләге үзеннән-үзе туды. Бер көнне уйланып утырганда “Илгә авырлык килгән вакытта син Ватаныңа ярдәм итәр өчен нинди яхшы гамәл кылдың соң?” дигән сорау туды. Бу хакта, минемчә, һәркем уйланырга тиеш. Ә менә мин үземчә ярдәм итәргә: шул акчаларга егетләребезгә алгы сызыкта бик кирәк булырдай әйберләр – ике бензопычкы һәм шөреп боргыч сатып алырга булдым. Алар үзебезнең Караидел егетләренә барып ирешмәгән очракта да, илебез мәнфәгатьләре өчен көрәшүче яугирләргә файдасы тисә, бик шат булыр идем. Командировкадан кайткач, мин Мирза Тәфкил улы белән янә элемтәгә кердем.– Күптән түгел районга махсус хәрби операциядә катнашучы егетләребезнең чираттагы төркеме ялга кайтып китте, – диде мобилизация башланган чакта үзе дә Казанда әзерлек үтүче якташларына гуманитар ярдәм илтеп кайткан район Советы депутаты. – Иманлы һәм ватанпәрвәр дин әһелебез Наил Нәбиулла улы нәкъ үзе теләгәнчә килеп чыкты: аның ярдәм йөзеннән алынган әйберләрен шул егетләребез аша үзләренә җибәрдек. Алар инде СВОдагы билгеләнеш пунктына барып җитте һәм иптәшләреннән дә рәхмәтләр әйтеп хәбәр иттеләр. Бәләкәй генә мисал кебек. Артык шапырынмый торган гына гамәл. Гади генә пычкылар, шөреп боргыч... Ләкин аның артында Ватанын сөюче олы йөрәк, иманлы калеб, сугышчыларыбызга ничек һәм нәрсә белән булса да ярдәм итү омтылышы, аларның җиңү белән һәм исән-имин кайтуын теләүче, сугыштан соңгы авыр елларны татып үскән ил агасының яшь яугирләр турында хәстәрлеге. Бронялы техника да, пилотсыз очу аппараты да, мылтык та, снаряд та түгел. Гади генә пычкылар, шөреп боргыч...Фәнис ГӘРӘЕВ.Караидел районы.