"Левитан түгел, Әхәт Мортазин ул!" (видео)

- Кыска гына гомерендә тау кадәрле мирас калдырды Әхәт абый, - диде бу хакта "Башинформ" акционерлар җәмгыяте рәисе Фәнүр Ягафәров. - Ул - диктор, алып баручы, әдәби әсәрләрнең радиопостоновкаларын эшләүче, сәхнәдән төрле чаралар алып баручы бәрхәт тавышлы җитди шәхес, шул ук вакытта, "Көлә-көлә "Һәнәк" килә" тапшыруында үзенә генә хас юмор белән халыкны көлдереп уйландыручы оста да булды. Ул үзен Галимнур Бикбулатовның шәкерте итеп таныды, ә бу чарада катнашучыларның күбесе, шул исәптән үзем дә, аның укучысы булуым белән бәхетле.Чарада Әхәт Мортазин белән озак еллар бергә иҗат иткән хезмәттәшләре, укучылары, якташлары, туганнары, гаиләсе дә бар иде.- Әхәт белән 30 ел бергә эшләдек, - диде радио-телевидение дикторы, легендар Наилә Галәветдинова. - Аның эштә пөхтәлеге, һәрнәрсәне ноктасына кадәр җиренә җиткерү, ә эштән соң күпкырлы шәхес, гаҗәеп соклангыч гаилә башлыгы булуын онытырсыңмы... Аның белән бергә эшләгән еллар - ул бәхет булган.Башкортстанның һәм Татарстанның халык артисты Зифа Нагаева Әхәт Мортазинга багышланган шигыре белән күпләрне тетрәндерде. Анда мәшһүр шәхеснең барлык гомер баскычлары барланган иде.Әхәт Мотаһар ул Учалы районында туып-үскән. Аның исемен мәңгеләштерү буенча төбәктә зур эшләр башкарыла. Шуңа да районның башкаладагы якташлар җәмгыяте рәисе, Башкортстанның халык артисты Вилдан Яруллин, авылдашы, Башкортстан телевидениесе һәм радиосы эшчәнлегендә бик әһәмиятле урын алып торган Луиза Фархшатова, абыйсы Нил Мотаһар улы аның туган ягыннан җылы сәламнәр тапшырды.- Без бу йортта 14 ел яшәдек, - диде улы Салават Мортазин. - Шушы бусагадан чыгып, әти һәр иртәдә республиканы сәламләргә ашыкты. Бүген шушы чарада җыелучылар безнең күңелдәге аны югалтудан туган бушлыкны тулыландырды. Әгәр шулай әйтергә яраса, әти исеменнән рәхмәт сезгә!Әхәт абыйның хәләле, «Башкортостан» дәүләт телерадиокомпанисе генеральный директорының радио эшчәнлеге буенча урынбасары Тәнзилә Үлмәсбаева бу чарада телмәр тотуны улына тапшырган иде. "Бүген иртән каберенә барып, "йоклап калма, сине зурлап халык җыела", дип әйтеп килдем, ишетте бугай, әнә кояш булып елмаеп карап тора үзе", - дип, тыйнак кына елмайды ул. Һәр даһи ирнең тылын менә шундый тыйнак хатыны саклый, диюләре хактыр.Башкортстанның халык артисты, республика Мәдәният хезмәткәрләре профсоюзы рәисе, үзен Әхәт Мортазинның укучысы да, коллегасы да дип таныгын Александр Кузьменконың чарада әйтелгән бер фикере уйга салды.- Бүген мин бер сагышлы, бер шатлыклы тойгылар кичерәм. Әхәт Мотаһар улы безнең арадан бик иртә китте, бу - сагыш, әмма ул һәрвакыт безнең арада - бу шатлык. Журналистлар еш кына аны "Башкортстан Левитаны" дип атый. Ялгышмагыз, коллегалар, ул Левитан түгел, ул - Әхәт Мортазин.Уйландырды...Бу мәшһүр шәхес безнең арада Әхәт Мортазин булып яшәячәк әле.