Бакчачылар рәхмәт укый

Башкортстан Башлыгы Радий Хәбиров кичә узган Хөкүмәт киңәшмәсендә Русия һәм Белоруссиянең Х форумына әзерлек турында сөйләде. 26-28 июньдә Башкортстанда ике илнең төбәкләре хезмәттәшлегенә йомгак ясалачак. Чараларда Федерация Советы Рәисе Валентина Матвиенко һәм Беларусь Милли җыелышының Республика советы җитәкчесе Наталья Кочанова катнашачаклар.Башкортстанда “Сәламәт республика – сәламәт төбәк” акциясе дәвам итә. Бу атнада күчмә бригадалар Кырмыскалы, Борай, Тәтешле, Ишембай, Дуван, Мәчетле, Туймазы һәм Әбҗәлил районнарында эшли. Бу хакта сәламәтлек саклау министры урынбасары Азат Рәхмәтуллин хәбәр итте. Быел 17 апрельдән 2 июньгә кадәр табиблар 51 952 кешене тикшергән. Нәтиҗәдә, шикәр чире, туберкулез һәм яман шеш авыруларына 1300дән артык шик ачыкланган. Чарада Радий Хәбиров “Ватанны саклаучылар” дәүләт фондының төбәк филиалы эшенә кагылышлы берничә йөкләмә бирде. Төбәк җитәк­чесе ассызыклавынча, СВОда катнашучылар һәм аларның якыннары кирәкле ярдәм күләмен алырга тиеш. Республика Башлыгы үз Хакимияте җитәкчесе Максим Забелинга фондка һәрьяклап ярдәм күрсәтергә кушты.Киңәшмә барышында ефәк күбәләгенә каршы көрәш турында фикер алыштылар. Төбәктәге хәл турында урман хуҗалыгы министры Марат Шәрәфетдинов сөйләде. Ул билгеләп үтүенчә, ефәк күбәләге яулап алган мәйдан 650 мең гектардан 390 мең гектарга кадәр кимегән. Әмма кулланылган препаратларның зарары аркасында белгечләр бу бөҗәккә каршы бөтен территориядә берьюлы көрәшә алмый. Быел ефәк күбәләген­нән 67 мең гектар массив эшкәр­теләчәк. “Без кешеләргә дә, башка бөҗәк­ләргә дә билгеле бер дәрәҗәдә тәэсир итә торган препаратлар кулланабыз. Реестрда химик һәм биологик препаратлар расланган. Без биологик белән генә эшлибез. Быел Баймак, Федоровка, Миякә, Бишбүләк районнары урманнарында 67 мең гектар эшкәртелә. Лагерьлар һәм бакчачылык ширкәтләре тирәсендә эш алып бара алмавыбыз аңла­шыла”, – диде Марат Шәрә­фетдинов. Ләкин ведомствода әлеге проблеманы хәл итү юлларын эзлиләр. Башкортстанда бакчачылык шир­кәтләрен төзекләндерүне арттыруны алга таба дәртләндерү өчен “Иң яхшы бакчачылык ширкәте” исеменә грант эшләнде. “Грантны спорт яисә уен, ял зоналары, җәмәгать корылмалары урнаштыруга, видео­күзәтү системалары, янгын сүндерү чаралары белән тәэмин итүгә һәм башкаларга юнәлтергә мөмкин булачак”, – дип белдерде Хөкүмәт вице-премьеры, авыл хуҗалыгы министры Илшат Фазрахманов. Конкурс нәтиҗәләре буенча, республиканың бакча ширкәтләренең 10 проекты сайлап алыначак, алар 500әр мең сум алачак. Нәтиҗәләрне киләсе елның язында бакчачыларның өченче форумында ясау планлаштырыла. Быел бакчачылык ширкәтләренә электр исәпләгечләр урнаштыруга 100 миллион сум юнәлтеләчәк. Бүленгән бюджет ассигнованиеләре 30дан артык ширкәттә 5000нән артык йорт хуҗалыгында электр энергиясен исәпкә алу приборларын урнаштырырга мөмкинлек бирәчәк. Чаралар 1 августка тәмамлана.Узган елда бүленгән 48,8 миллион сум Уфа, Иглин районнары һәм Уфа шәһәре территориясендә 17 бакчачылык ширкәтенә ярдәм итәргә мөмкинлек биргән. Барлыгы 2470 исәпләү приборы урнаштырылган. Агымдагы елда бакчачылык ширкәтләренә республика бюджетыннан 250 миллион сум бүлү карал­ган. Аерым алганда, 100 миллион сумны ширкәтләргә керү юлларын тергезүгә юнәлтәчәкләр. Шул ук күләм электр энергиясен исәпкә алу приборларын алмаштыруга китәчәк. Калган 50 миллион сум инфраструктура объектлары белән тәэмин итүгә тотынылачак.Быел “СНТ” тарафыннан субси­дияләр алу тәртибе гадиләштерелде һәм яңа дәүләт ярдәме чаралары белән тулыландырылды. Эчке инфраструктура объектларын төзүгә, ремонтлауга подряд оешмаларын җәлеп итү мөмкинлеге барлыкка килде. Бу бакчачылык ширкәтләрен кәгазь мәшәкатеннән азат итәргә һәм махсуслаштырылган оешмалар белән турыдан-туры эшләргә мөмкинлек бирәчәк. Фото: pro-dachnikov.com