Белорустар менән бергә!

Башҡортостан Башлығы Радий Хәбиров "Эксперт Урал" баҫмаһына биргән интервьюһында белоустар менән уртаҡ эшмәкәрлек тураһында һөйләне. – Республиканың перспективалы тармаҡтары иҫәбендә – фармацевтика һәм еңел сәнәғәт. Уларҙы үҫтереү өсөн ниндәй шарттар булдырыла? – Шулай ҙа беҙҙең өсөн юғары технологиялы йүнәлештәр иң мөһиме булып тора. Башҡортостан иҡтисадтың төп тармаҡтарында: авиатөҙөлөштә, машиналар эшләүҙә, энергетикала алдынғы урындарҙы биләй. Республикала 450-нән ашыу предприятие инновациялы эшмәкәрлек менән шөғөлләнә, заманса технологияларҙы производствоға индерә. Шулай уҡ сәнәғәтебеҙ йүнәлешен үҙгәртеүҙе дауам итәбеҙ. Республика өсөн хас булмаған яңы йүнәлештәрҙе үҫтереү мөһим. Мәҫәлән, тап Башҡортостанда илдәге тәүге мебель кластеры булдырылды. Беҙҙә еңел, ағас эшкәртеү сәнәғәтенә, халыҡ художество кәсептәренә, реабилитация саралары етештереүгә ярҙам итеү буйынса программалар күп. Программалар сиктәрендә бюджетҡа аҡса һалабыҙ һәм яңы ҡорамалдар, сеймал һәм материалдар һатып алыуға субсидия бирәбеҙ. Башҡортостан иҡтисадын үҫтереүҙең стратегик бурыстарының береһе – еңел сәнәғәт продукцияларын етештереү күләмен арттырыу. Беҙҙә еңел сәнәғәт үҫеше, беренсенән, ҡатын-ҡыҙҙарҙы эшкә урынлаштырыу менән бәйләнгән. Икенсенән, ысын импортҡа алмаш менән. Эш, хәрби, махсус кейем тегеү буйынса компетенцияларыбыҙ ярайһы көслө. Ләкин беҙ бында шулай уҡ ҡатын-ҡыҙҙар күлдәктәре, ир-егеттәр кейемдәре, заманса спорт кейемдәре тегеүҙәрен теләйбеҙ. Һәм был йүнәлеш үҫешә башланы. Мәҫәлән, Ишембайҙа “Алға” махсус иҡтисади зонаһы биләмәһендә май айында ZASPORT Рәсәйҙең олимпия йыйылмаһын кейендереүсе компанияның теген фабрикаһы асылды. Был йүнәлештә Белоруссия предприятиелары менән дә бик әүҙем эшләйбеҙ. Фармацевтика сәнәғәтенә килгәндә, бында ла ыңғай динамика күҙәтелә. Мәҫәлән, беҙҙең “Фармстандарт-ӨфөВИТА” предприятиеһы – илдә моно һәм поливитамин препараттар етештереү буйынса алдынғы. Иң мөһиме – әүҙем үҫешә, инвестиция проекттарын ғәмәлгә ашыра. Мәҫәлән, 2022 йылда компания гемофилияны дауалау өсөн гемостатик плазма препараты етештереү участкаһын төҙөүҙе тамамланы. Шуға күрә Башҡортостандың да бындай үҙенсәлекле компетенциялары бар. – Июндә Өфөлә Рәсәй һәм Беларусь төбәктәренең Х форумы уҙа. Һеҙ белорустарҙың “АМКОДОР” машиналар эшләү холдингы менән берлектәге предприятие тураһында әйттегеҙ. Башҡортостан предприятиелары Белоруссия яғы менән тағы ниндәй мөһим проекттарға йәлеп ителгән? – Республика һәм Беларусь иҡтисадтары йылдам үҫешә, тауар әйләнеше арта. Әммә беҙ үҙ-ара сауҙа итеү менән генә сикләнеп ҡалмайбыҙ, ә тәрән интеграция юлынан барабыҙ. Был Белоруссия предприятиеларының беҙҙә, унда бер нисә беҙҙең компанияның ҡатнашыуы. Мәҫәлән, Башҡортостандың станоктар эшләү заводы әле Белоруссияла эшләй, унда берлектәге предприятие төҙөй. Хеҙмәт, энергетика ресурстарының, дәүләт һәм шәхси инвестицияларҙың булыуын иҫәпкә алып, беҙ белорустарҙы Башҡортостанда бер нисә предприятие төҙөүгә йәлеп итә алдыҡ. Тәгәрмәсле тракторҙар йыйыуҙа күптән үҙ-ара эш итәбеҙ, ә быйылдан алып сылбырлы тәгәрмәсле тракторҙар ҙа йыя башланыҡ. Республикабыҙ – ауыл хужалығы төбәге, беҙгә 1,5-2 мең сылбырлы тәгәрмәсле заманса трактор кәрәк. Әлегә аҙ һанда машина комплекттары менән тәьмин итеүҙән башланыҡ. Әммә аҡрынлап күләмдәр арта, артабан производствоның локалләштереү кимәлен дә күтәрәсәкбеҙ. Беҙҙә Белоруссия менән берлектәге троллейбустар эшләү предприятиеһы хеҙмәт күрһәтә, Рәсәй ҡалаларында 200-гә яҡын машина йөрөй. Йыл дауамында 40 троллейбус Башҡортостан ҡалалары буйлап йөрөй башлаясаҡ. Уҙған йылдың сентябренән “АМКОДОР” холдингы менән берлектә төҙөлә башлаған завод иген киптергестәр сығарасаҡ. Элек уларҙы сит илдән килтерәләр ине. Ә быйыл импортҡа алмаш бирәсәк тулы ҡеүәтле производство булдырыласаҡ. Әйткәндәй, заводты тиҙ темпта төҙөйбөҙ. Уны быйыл йәй асырға ниәтләйбеҙ. “АМКОДОР” компанияһы беҙҙең республикала йәнә бер завод – дәүләт контракты шарттарында коммуналь техника етештереү буйынса завод төҙөү мөмкинлеген ҡарай. Шуға күрә Белоруссия бизнесы менән интеграция, уның компетенцияларын локалләштереү эше беҙҙә дауам иттереләсәк. Фото: "Башинформ".