Башҡортостан Республикаһы Хөкүмәте Премьер-министры Андрей Назаров етәкселегендәге Хөкүмәт ултырышында халыҡтың айырым категорияларын янғын тураһында иҫкәртеү ҡулайламалары менән тәьмин итеү мәсьәләһе ҡаралды. – Был эш даими алып барыла. Республикабыҙ илдә халыҡтың ундан ашыу льготалы категорияһы янғын тураһында иҫкәртеү ҡулайламалары менән бушлай тәьмин ителгән берҙән-бер төбәк булып ҡала. Ошо проект тормошҡа ашырыла башлағандан алып социаль яҡтан хәүефле хәлдәге һәм аҙ тәьмин ителгән ишле ғаиләләргә 82 меңдән ашыу янғын иҫкәртеү ҡулайламаһы ҡуйылған, – тине Андрей Назаров. Республика Хөкүмәте Премьер-министры әйтеүенсә, был маҡсатҡа аҡса йыл һайын бүленә. Башҡортостандың Ғәҙәттән тыш хәлдәр буйынса дәүләт комитеты рәйесе Фәрит Ғүмәров башҡарылған эш тураһында ентеклерәк һөйләне. Уның билдәләүенсә, республика бюджеты с иҫәбенә быйыл 20 меңдән ашыу янғынды иҫкәртеү ҡулайламаһы тапшырылған. Ошо осорҙа ҡулайлама 1007 кеше, шул иҫәптән 382 баланы янғындан ҡотҡарырға ярҙам иткән. Башҡортостан Республикаһы Башлығы Радий Фәрит улы Хәбировтың күрһәтмәһенә ярашлы халыҡтың йәнә ике категорияһын – коммерцияға ҡарамаған баҡсасылыҡ, йәшелсәселек һәм дача ширҡәттәрендә даими теркәлгән, шулай уҡ шәхси йорттарҙа йәшәгән пенсия йәшендәге граждандарҙы ошондай ҡулайламалар менән тәьмин итеү ҡарала. Фото: pravitelstvorb.ru Сығанаҡ: pravitelstvorb.ru