Башкортстанга эссе һава торышы килде һәм республика халкы су коену сезонын ачты. Әлегә рәсми түгел. Яхшы һава торышына коткаручылар гына шат түгел. Төбәкнең Гадәттән тыш хәлләр министрлыгы күңелсез статистика белән уртаклашты: республикада 39 кеше батып үлгән. Үткән атнада тагын өч бала су корбаны булды. Еш кына өлкәннәр суга исерек килеш керә, ә кайберләре балаларының суга кереп киткәнен күрми дә кала. - Сулыкларга барып җитү җиңел түгел. Чөнки күпләр су коену өчен махсуслаштырылмаган елга-күлләргә дә ял итәргә бара. Күптән түгел 16 яшьлек егет шулай югалган. Аның гәүдәсен ярдан 25 метр тирәнлектә табалар. Балалар олылардан ешрак бата. Бу күңелсез статистика фактлар белән раслана. Бүгенге көндә Башкортстан Республикасында суда кешеләр үлеменә бәйле 39 вакыйга теркәлгән. Үткән ялларда гына да өч бала һәлак булган дүрт вакыйга булды. Бер баланы коткарып кала алганнар, - ди Русия Гадәттән тыш хәлләр министрлыгының Башкортстан буенча Баш идарәсе матбугат хезмәте башлыгы Алик Шәрәфетдинов. Уфада быел су коену өчен 10 рәсми урын оештырылган. Хәзер аларны ачуга актив әзерлек бара. Ә республика буенча быел җәй 127 пляж эшләячәк, тагын 5 пляж аттестация уза. 1 июньдә су коену сезоны рәсми рәвештә ачылачак. Фото: stock.adobe.com