“Уенчыкларыбыз да үзебезнеке булсын!”

“Башкортостан” иреклеләр полкын формалаштыруны 30 июньгә кадәр тәмамлау планлаштырыла, дип хәбәр итте кичә Хөкүмәтнең оператив киңәшмәсендә республика җитәкчесе Радий Хәбиров.— Без “Башкортостан” иреклеләр полкын оештыру эшен дәвам итәбез. Анда 2,5 меңләп сугышчы исәпләнәчәк, дип фаразлыйбыз. Аларның Самара өлкәсендә хәрби әзерлек үтү өчен тулы вакыты булсын өчен бу эшне 30 июньгә кадәр тәмамлау зарур, — дип белдерде ул. Билгеле булуынча, 25 майда Чишмә районындагы Русия Герое Максим Серафимов исемендәге “Патриот” паркы территория­сен­нән Сергей Зорин исемендәге башкорт танк батальоны һәм Шәриф Сөләйманов исемен­дәге башкорт зенит-артиллерия батареясе хәрби әзерлек урынына тантаналы озатылды. Ике хәрби бүлекчә дә “Башкортостан” ирекле полкы составына керәчәк.“Бердәм Русия”нең электрон алдан тавыш бирүендә 250 меңнән артык кеше катнашты”, — дип белдерде Радий Хәбиров. Элек хәбәр итүебезчә, 22-28 майда бөтен республика халкы тавыш бирүдә катнашты һәм “Бердәм Русия” партиясеннән җиденче чакырылыш Дәүләт җыелышы-Корылтайга депутатлыкка кандидатлар итеп тәкъдим итү өчен кандидатларны билгели алды.Быел сентябрьдә Дәүләт җые­лышы-Корылтайга һәм урындагы үзидарә органнарына сайлаулар узачак. Ил буенча алдан тавыш бирү башлануы турында 1 мартта игълан ителде. “250 меңнән артык тавыш бирүче — бу сайлаулар белән кызыксынуны күрсәтүче бик югары күрсәткеч, — дип билге­ләп үтте Радий Хәбиров. — Без 23 июньдә йомгак ясаячакбыз, республика конферен­циясендә “Бердәм Русия” Дәүләт җыелышы-Корылтайга сайлауларда катнашу өчен кандидатларны раслаячак”. Уфада 26-28 майда “Китап-байрам” беренче Халыкара китап ярминкәсе узды. Киңәшмәдә аңа йомгак ясап, Радий Хәбиров быел сентябрь уртасында Совет мәйданында Башкортстанда Беренче Русиядә җитештерел­гән балалар уенчыклары һәм балалар өстәл уеннары индустриясе форумы узачагын хәбәр итте. Форумны ел саен уздыру планлаштырыла. — Без шундый тәкъдим белән чыктык: агымдагы елның көзендә Русия Федерация­сендә җитештерелгән балалар уенчыклары һәм өстәл балалар уеннары индустриясе форумын уздырачакбыз. Мин алар партнер булсын өчен Русиянең сәнәгать министры исе­менә хат әзерләүне сорыйм. Бу бик кызыклы һәм актуаль тема. Анда презентация дә, эшлекле өлеш тә булачак. Хөкүмәткә балалар уенчыклары җитештерүче сәнәгатькә ярдәм чаралары әзерләүне йөклим. Безгә үз уенчыкларыбызны ясарга, үз идеологиябезне уенчыклар аша үткәрергә, илебез, геройларыбыз нинди булуы турында сөйләргә кирәк. Моңа җитди әзерләнүегезне сорыйм, — диде Башкортстан Башлыгы. Гомумән алганда, “Китап-байрам” Халык­ара китап ярминкәсенә 162,5 мең уфалы һәм шәһәр кунаклары килгән. Ярминкәдә 52 меңнән артык басма сатылган. Чарада 206 китап нәшрияты һәм китап сату оешмасы, Русиянең 16 төбәге һәм 6 ил катнашкан. Бу саннарны оператив киңәшмәдә мәдәният министры Әминә Шәфыйкова китерде. Бәйрәм кунаклары Башкортстан башкаласындагы чисталыкны һәм тәртипне билгеләп үткән. Бу хакта республика Башлыгы хәбәр итте. Радий Хәбиров ассызыклавынча, Баш­кортстанның барлык торак пунктларын чисталыкта тоту мөһим. “Җәй — кемдер өчен яллар чоры, торак-коммуналь хуҗалык һәм төзекләндерү линиясе буенча бу, һичшиксез, иң кызу эш вакыты. Муниципалитет башлыкларыннан территорияләрнең чиста булуын үтенеп сорыйм. Безнең моңа аерым игътибар бирүебезне беләсез. Сүз уңаенда, без китап ярминкәсенә килгән күпләр белән аралаштык. Алар Уфаның шундый чиста, пөхтә булуына соклану белдерде. Шуңа күрә барлык торак пунктларны тиешле тәртиптә тотуыгызны сорыйм”, — диде төбәк җитәкчесе.Радий Хәбиров язгы кыр эшләренең тиздән тәмамланачагы турында хәбәр итте. Респуб­ликаның Авыл хуҗалыгы министрлыгы мәгъ­лүматлары буенча, төбәк хуҗалыклары 2 миллион гектардан артык мәйданда язгы культуралар чәчкән. Эшләр соңгы гектарларда бара, нигездә, ерак участокларда соңгы культуралар чәчелә. Радий Хәбиров республикада янгыннар белән бәйле хәлне контрольдә тотарга кушты. “Коточкыч эсселек. Тагын бөтен җир кибә. Янгыннардан сакланырга кирәк. Бәла янау сизелү белән бөтен көчегезне шунда юнәлте­гез”, — дип йөкләмә бирде республиканың Гадәттән тыш хәлләр буенча дәүләт комитетына төбәк җитәкчесе. Узган тәүлектә генә Белорет, Мәчетле һәм Краснокама районнары территориясендә 38 гектар мәйданда тугыз урман янгыны теркәл­гән. Моннан тыш, бары тик бер тәүлек эчендә 18 гектар мәйданда коры үлән януның 24 очрагы теркәлгән. Барлык янгыннар сүндерелгән, торак пунктларына янаулар юк.