Кашни ҫыннӑнах куҫа курӑнман хӗвелӗ пур: хӑшӗсен вӑл анчах ҫуралса тухать, теприсен - ҫӳл тӳпере ялкӑшать, виҫҫӗмӗшсен - анса та ларнӑ ӗнтӗ. Ку вӑл - пирӗн чун-чӗресенчи юрату хӗвелӗ. Паян - хӗвеллӗ ҫынсен кунӗ! Эпӗ вӗсене ҫакӑн ячĕпе хам хӗвелӗн шевлине парнелетӗп. Йышӑнсамӑр, тархасшăн, туссем!
САВНИН ХӖВЕЛӖ
Асаилӳ ҫути ҫунать ҫаплах -
Курас килет сана кунран-кунах.
Куҫ умӗнчех вунҫиччӗри пике,
Пĕрремĕш хут хӗретнисем пите.
Асран тухмасть пĕрремĕш чуптӑву,
,,- Савни ! " - тесен вут- ҫулӑмпа хыпни.
Чӗр туйӑмпа ҫуралнӑ сан сӑвву,
Алла-алӑн ҫерем тӑрӑх чупни.
Телейлӗ те хӗвеллӗ самантсем,
Ҫунатлӑ ҫамрӑклӑх, юмах пек юрату.
Ӑҫта кайса саланчӗҫ-ши вӗсем -
Чунра пылак та йӳҫӗ ырату?
Кунсеренех тухать савнин хӗвелӗ,
Асаилӳн ҫап-ҫутӑ ҫӗршывне.
Унта вара чӗреҫӗм те телейлӗ,
Туймастӑп эп ҫулсем пусарнине.
Тавах сана, ыр чунлӑ чӑваш хӗрӗ,
Ку тӗнчере санран хаклийӗ ҫук.
Сан ятупа ҫӗре те эпӗ кӗрӗп,
Ӗмӗрлӗхе те хывӑп такӑр ҫул.