Өфөлә барған “Китап байрамы” халыҡ-ара китап йәрминкәһе майҙансыҡтары төрлө ҡыҙыҡлы саралар, осрашыуҙар шауҡымы аҫтында гөрләп тора. Бөгөн, 26 майҙа, төрлө сәхнәләрҙе бихисап саралар үтте. Беҙ уларҙа ҡатнашыусылар менән осрашып, ошо байрам, Өфө, Башҡортостан тураһында тәьҫораттар, фекерҙәр менән уртаҡлаштыҡ. Бикә Ҡолончакова - Дағстан Республикаһының халыҡ яҙыусыһы байрамда нуғай телендә сығыш яһаны, беҙҙең менән әңгәмә барышында ла туған телендә яуап бирҙе. Әйтергә кәрәк, телдәребеҙ бик яҡын һәм оҡшаш. - Миңә, иң тәү сиратта, сараның исеме “Китап байрамы” тип аталыуы оҡшаны. Был үҙе үк китапҡа, нәфис әҙәбиәткә, һүҙ сәнғәтенә ихтирам-хөрмәтте күрһәтә. Икенсенән, халыҡтың күп булыуын, кешеләрҙең ғаиләһе, балалары менән килеүен күреп ҡыуандым. Сауҙа рәттәре буйлап йөрөгәндә ололарҙың да, йәштәрҙең дә, хатта бәләкәй балаларҙың да китап һатып алыуы шатландырҙы. Яҙыусы булараҡ, туған телдәр, милли нәшриәт һәм баҫмалар яҙмышы ныҡ борсой. Артыҡ күп һанлы халыҡ булмаһаҡ та, телебеҙҙе һаҡлап йәшәргә тырышабыҙ. Беҙҙә нуғай телендә “Дала тауышы” (“Голос степи”) гәзите, “Байтирәк” әҙәби-ижтимағи журналы, балалар өсөн “Лашын” (башҡортса әйткәндә – ыласын) журналы донъя күрә. Был йүнәлештәге эштәр дәүләттең ярҙамына, ҡурсалауына мохтаж. Һеҙҙең республикалағы ошондай иғтибар-хәстәрҙе күреп һоҡландым, - тине Бикә ханым. Бөгөн М. Аҡмулла исемендәге БДПУ янындағы сәхнәлә Бөтә Рәсәй сәсәндәр фестивале үтте. Унда ҡатнашҡан Анна Кириллина Саха (Яҡут) Республикаһынан, ул – яҡут теле уҡытыусыһы. - Мин бөгөн олонхо – яҡут халҡының боронғо эпик сәнғәте өлгөһөн башҡарҙым. Башҡортостанға тәүгә килдем, миңә Өфө ҡалаһы, сараны ойоштороу кимәле ныҡ оҡшаны. Халыҡ бик ҡунаҡсыл, ойоштороусылар алсаҡ, һәр кемгә иғтибарлы. Байрамдың һәр өлөшө ныҡлы уйланып, юғары кимәлдә ойошторолған, - тине Анна. Көн дауамында уҙғарылған күләмле сарала Ырымбур, Силәбе, Свердловск өлкәләре, Дағстан, Саха (Яҡут), Алтай республикалары, Мәскәү ҡалаһы сәсәндәре, яҡын һәм алыҫ сит илдәр вәкилдәре ҡатнашты. Башҡортостан исеменән Әбйәлил, Бөрйән, Ғафури, Салауат, Өфө, Хәйбулла, Шишмә райондары, Сибай, Өфө ҡалалары сәсәндәре сығыш яһаны. Совет майҙанындағы ҙур сәхнәлә төшкөһөн Рәсәй Геройы М. Шайморатов исемен йөрөткән кластарҙа белем алған уҡыусылар араһында үткән "Шиғырҙарҙа – Тыуған ил тарихы" конкурсына йомғаҡ яһалды. Иҙел Исмәғилев әлеге конкурста 2-се урынды яуланы. Ул – Өфө ҡалаһындағы М. Исҡужин исемендәге 136-сы башҡорт лицейының 5-се класс уҡыусыһы. Иҙел “Шайморатов класы”нда белем ала, бәләкәйҙән ҡурай түңәрәгенә йөрөй. - Шайморатов класында уҡыу ныҡ оҡшай. Был класҡа яҡшы уҡыған балаларҙы ғына һайлап алалар. Спорт ярыштарына, төрлө конкурстарға, олимпиадаларға йөрөйбөҙ, программалау серҙәренә өйрәнәбеҙ. Был конкурсҡа уҡытыусым Гөлсәсәк Әхәт ҡыҙы Ғәзизуллина менән әҙерләндем. Еңеүем өсөн ныҡ ҡыуандым. Бөгөнгө байрам да оҡшай. Беҙ бөтә ғаиләбеҙ менән килдек, - тине Иҙел. Айгөл Ғәбитова һәм автор фотолары.