Башҡортостан Республикаһы Хөкүмәте премьер-министры Андрей Назаров Сибайҙа «Урал аръяғы-2023» Бөтә Рәсәй инвестиция һабантуйы сиктәрендә үткән «Глобаль үҙгәрештәрҙә яңы үҫеш мөмкинлектәре» пленар ултырышында ҡатнашты. Андрей Назаров инвестиция һабантуйының тәү сиратта ошо биләмәгә баҫым яһау өсөн уҙғарылыуын билдәләне. Быйыл форумда 8 илдән 3,5 мең вәкил ҡатнашҡан. Форум Урал аръяғын үҫтереүгә ҙур өлөш индерә, тип һыҙыҡ өҫтөнә алды Премьер-министр. - Бынан бер нисә быуат элек Башҡортостандың Урал аръяғы Көньяҡ Уралда иң инвестиция йәлеп итеүсән урындарҙың береһе булыуын барыһы ла белмәйҙер ҙә, моғайын. Йөҙ йыл элек ямғырҙан һуң бында бәшмәк кеүек рудниктар, фабрика-заводтар үҫеп сыҡҡан. Инвестиция форумы арҡаһында һуңғы дүрт йылда Урал аръяғына йәлеп ителгән инвестиция күләме 82 миллиард һумдан ашҡан. 200 инвестиция проекты тормошҡа ашырыған. Уҙған йылда ғына 87-һе тамамланған. Санкция сикләүҙәренә ҡарамаҫтан, эш әүҙемлеге кәмемәй. Әлеге ваҡытта 150 миллиард һумдан ашыу суммаға 198 инвестиция проекты тормошҡа ашырыла башлаған. Урал аръяғының социаль инфраструктураһын үҫтереү өсөн беҙ Республика адреслы инвестиция программаһының һәм башҡа федераль, төбәк инструменттарының мөмкинлектәрен әүҙем файҙаланабыҙ. Дүрт йылда 90-дан ашыу фельдшер-акушерлыҡ пункты, дауаханалар, амбулаториялар, мәктәптәр, балалар баҡсалары һәм 14 мәҙәниәт учреждениеһы сафҡа индерелгән һәм ремонтланған. 150 йәмәғәт һәм ихата биләмәләре төҙөкләндерелгән. Беҙ һаулыҡ һаҡлау тармағын нығытыу өҫтөндә лә системалы һәм планлы рәүештә эшләнек. Булған медицина учреждениеларына ҙур капиталь ремонт үткәрелде. Был маҡсатҡа яҡынса 175 миллион һум йүнәлтелгән. 1000-дән ашыу берәмек медицина ҡорамалы ҡуйылған. Әлеге ваҡытта Учалыла хирургия корпусы һәм Баймаҡта балалар поликлиникаһы төҙөйбөҙ. Алдағы өс йылда Асҡарҙа һәм Учалыла тағы ике поликлиника төҙөйәсәкбеҙ. 37 яңы фельдшер-акушерлыҡ пункты һәм 4 табип амбулаторияһы буласаҡ. Мәғарифта яңы мәктәптәр һәм балалар баҡсалары төҙөүгә һәм булғандарын яңыртыуға айырым иғтибар бүлдек. Дүрт йыл эсендә балалар баҡсалары менән берләштерелгән 4 мәктәп төҙөлгән (576 уҡыусыға һәм 360 мәктәпкәсә урын). 17 белем биреү учреждениеһы капиталь ремонтланған. Хәҙер Баймаҡ һәм Бөрйән райондарында, шулай уҡ Сибайҙа тағы 8 мәктәпте тәртипкә килтерәбеҙ. Сибай гимназия-интернатын төҙөкләндереү башланды. Асҡарҙа (Әбйәлил районы) 800 урынлыҡ балалар баҡсаһы менән мәктәп төҙөйбөҙ. Аҡъярҙа интернат менән полилингваль мәктәп төҙөлөп бөтөп килә. Был проектҡа 920 миллион һумдан ашыу аҡса һалынған. «Урал аръяғы балалары» белем биреү үҙәгенең яңы корпусын проектлау этабын тамамлайбыҙ. Ғәҙәттәгесә, мәҙәниәт өлкәһенә ҙур иғтибар бүләбеҙ. Дүрт йылда яҡынса 560 миллион һумға 14 мәҙәниәт объекты төҙөкләндерелгән, капиталь ремонтланған һәм йыһазландырылған. 37 мәҙәниәт йортоноң матди-техник базаһы нығытылған. «Шүлгәнташ» музейы төҙөлөшөн тамамлау (458,9 миллион һум) иҫтәлекле ваҡиға булды. Киләһе йылдарҙа 2 миллиард һумға тиерлек 7 объект төҙөргә, ремонтларға планлаштырабыҙ. Спорт инфраструктураһын үҫтереү өсөн Бүребайҙа физкультура-һауыҡтырыу комплексы, Аҡъярҙа бассейн, Темәстә бассейн менән физкультура-һауыҡтырыу комплексы һәм Баймаҡта ябыҡ һырғалаҡ төҙөйбөҙ. Йәмәғәт киңлектәрен һәм торлаҡ-коммуналь инфраструктураны яҡшыртыу кешеләрҙең тормошо өсөн имен мөхит булдырыуҙың мөһим элементы булып тора. Республика Башлығы Радий Фәрит улы Хәбировтың башланғысы буйынса тышҡы яҡтыртыу системаларын яңыртыу программаһы тергеҙелде. Урал аръяғының юл инфраструктураһын үҫтереүгә дүрт йыл эсендә 12 миллиард һумға яҡын аҡса йүнәлтелгән. Дөйөм алғанда, 2025 йылға тиклем тағы 240 саҡрым самаһы юл һәм 600 погонлы метр күпер төҙөргә һәм йүнәтергә ниәтләйбеҙ. Экологик төшөнсә лә - иғтибарыбыҙҙың үҙәгендә. Урал аръяғында 2 меңдән ашыу контейнер майҙансығы төҙөлгән, 6 мең контейнерға яҡын контейнер ҡуйылған. Шуныһы мөһим: уларҙың меңдән ашыуы ҡалдыҡтарҙы айырып йыйыу өсөн тәғәйенләнгән. Барлыҡ билдәләнгән һәм башҡа эштәрҙе 2030 йылға тиклем Урал аръяғын социаль-иҡтисади үҫтереү стратегияһы рәүешендә системалаштырҙыҡ. Ул былтыр йәмәғәтселек, бизнес-структуралар, фәнни ойошмалар менән киң фекер алышыу йомғаҡтары буйынса ҡабул ителде. Стратегияла төбәгебеҙҙе үҫтереүҙең маҡсатлы йүнәлештәрен билдәләнек. Стратегик проекттар әҙерләп, уларҙы тормошҡа ашыра башланыҡ. Стратегияны һөҙөмтәле тормошҡа ашырыу, инвестиция проекттарын әүҙем йәлеп итеү һәм оҙатыу өсөн бөгөн Социаль-иҡтисади үҫеш буйынса дирекция асылды. Бергәләп билдәләнгән һөҙөмтәләргә өлгәшәсәкбеҙ, амбициялы башланғыстарҙы һәм проекттарҙы тормошҡа ашырасаҡбыҙ, - тип билдәләне Андрей Назаров. Фото: pravitelstvorb.ru