Яңы тимер юл – яңы мөмкинлектәр

Башҡортостанда «Сибай - Яңы рудный» тимер юлын төҙөү планлаштырыла. Башҡортостан Республикаһының Транспорт һәм юл хужалығы министрлығы менән «ВЭБ Инфраструктура» акционерҙар йәмғиәте («ИнфраВЭБ» акционерҙар йәмғиәте) араһында ошо проектты тормошҡа ашырыу буйынса тейешле килешеү V «Урал аръяғы - 2023» Бөтә Рәсәй инвестиция һабантуйында төҙөлдө. Проектты тормошҡа ашырыу республика һәм тотош ил күләмендә һиҙелерлек синергетик һөҙөмтә бирәсәк. Тимер юл төҙөлөшө Рәсәй Хөкүмәте рәйесе урынбаҫары Дмитрий Чернышенкоға тәҡдим ителгән Башҡортостандың биш «алға китешле проекты» иҫәбендә. Тимер юл Урта һәм Төньяҡ Уралдың көнсығыш райондарының тура бәйләнешен тәьмин итәсәк. Улар араһында - Силәбе йөк тейәгән тимер юл узелы. Юл Башҡортостан һәм Ырымбур өлкәһе биләмәһенән үтеп, эшкәртеүсе предприятиелар, шул иҫәптән Сибай һәм Бүребайҙағы төҫлө металл ятҡылыҡтарын - Подольск, Төньяҡ Подольск, Көнсығыш Подольск һәм Юбилейныйҙы тоташтырасаҡ. - Бында перспективалы ятҡылыҡтарҙың дөйөм запасы 200 миллион тонна самаһы руда тәшкил итә. Уларҙы, һис шикһеҙ, иҡтисади әйләнешкә өҫтәмә йәлеп итергә мөмкин. Был магистраль беҙҙең даими партнерҙарыбыҙ - Ҡытайға яңы юлдар асасаҡ һәм сауҙа һәм иҡтисади мөнәсәбәттәрҙе киңәйтеүгә ҡеүәтле импульс бирәсәк, логистик ярҙамды 250 саҡрымға кәметәсәк, - тип һыҙыҡ өҫтөнә алды Башҡортостан Республикаһы Хөкүмәте рәйесе Андрей Назаров. Проект Көнсығышҡа боролош концепцияһын ғәмәлгә ашырыуҙың мөһим элементы булып тора. Был проектты тормошҡа ашырыу буйынса эш 2021 йылда уҡ әүҙем башланғайны. Ул саҡта республика Хөкүмәте, Урал тау-металлургия компанияһы һәм «Рәсәй тимер юлдары» компанияһы араһында тимер юл инфраструктураһын үҫтереү өлкәһендә хеҙмәттәшлек тураһында килешеү төҙөнө. Бөгөн проекттың техник-иҡтисади нигеҙе әҙерләнгән, уға ярашлы уны ғәмәлгә ашырыу туғыҙ йыл самаһы ваҡытты аласаҡ. Яҡынса баһалауҙар буйынса, инвестицияларҙың дөйөм күләме 116 миллиард һумдан ашасаҡ. Яңы тимер юл тармағының 2035 йылға планлаштырылған дөйөм йөк әйләнеше йылына 14 миллион тоннаға етәсәк. Мәғдән һәм нефть йөктәре, ҡара металдар һәм төҙөлөш материалдары йөктәрҙең төп номенклатураһы буласаҡ тип күҙаллана. Һөҙөмтәлә төрлө өлкәләрҙә миллиардлаған инвестиция проекттарын тормошҡа ашырырға, Урал аръяғы төбәгендә өҫтәмә эш урындары булдырырға мөмкин буласаҡ. Бынан тыш, проект көнсығыш илдәре менән тышҡы иҡтисади бәйләнештәрҙе лә нығытырға мөмкинлек бирәсәк. Денис Ноздрачев билдәләүенсә, төп бурыс - ҡыҙыҡһыныуҙарҙы һәм хәүефтәрҙе иҫәпкә алыу. Башҡортостан Хөкүмәте премьер-министры һүҙҙәренсә, яңы тимер юл тармағы руда ятҡылығын артабан үҫтереү мәсьәләләрен хәл итәсәк һәм күберәк йөктәр ташырға мөмкинлек бирәсәк. Фото: pravitelstvorb.ru