26 майҙа Сибайҙа V «Урал аръяғы» Бөтә Рәсәй инвестиция һабантуйы майҙансығында Башҡортостан Башлығы Радий Хәбиров журналистар менән әңгәмәлә төбәктең инвестиция ҡануниәтен реформалау тураһында һөйләне. Инвесторҙар менән эшләүҙең яңы стратегияһы үҙенсәлеге нимәлә, тигән һорауға республика Башлығы Радий Хәбиров түбәндәгесә яуап бирҙе: - Беҙҙә үҙгәрештәр структураһы бар, улар ҡағыҙҙа рәсмиләштерелгән дә инде. Асылы - бюрократик процедураларҙы ябайлаштырыуҙа. Мәҫәлән, инвестор беҙгә килеп: «Завод төҙөргә, өҫтөнлөклө проект статусын алырға һәм ерҙе сауҙалашыуһыҙ ҡуртымға алырға теләйем», - ти. Беҙ: «Күпме аҡсаң бар?» - тип һорайбыҙ. Уға иҫәптә билдәле бер сумманы, проект хаҡының яҡынса 50 процентын күрһәтергә ҡушабыҙ. Ысынында иһә ул күпмелер аҡсаны бурысҡа ала, әлегә күпмелер аҡсаһы юҡ. Һәм уның аҡсаһы бармы, юҡмы икәнлегенән беҙгә бер әһәмиәт тә юҡ. Эйе, ҡайһы бер инвесторҙарҙың тәжрибәһеҙлеге йәки уйламайынса эшләүе арҡаһында инвестиция проекты топмошҡа ашмауы менән осрашабыҙ. Әммә бындай осраҡтар күп түгел. Шуға күрә бурыс - ҡаршылыҡтарҙы бөтөрөү. Ярҙамдың төп өлөшө булып, ҡағиҙә булараҡ, сауҙаһыҙ ерҙе тиҙ, һөҙөмтәле бүлеү тора. Был мәсьәләләр беҙҙә бер йыл элек һәм унан күберәк ваҡыт эсендә хәл ителә ине. Мөрәжәғәт иткән көндән алып 41 көнгә тиклем ваҡытты кәметеү бурысын ҡуйҙым. Бының өсөн бер нисә норматив хоҡуҡи акттарҙы актуалләштерергә кәрәк. 1 июлдә республика Хөкүмәте яңыртылған инвестиция ҡануниәтенең тулы пакетын тәҡдим итер тип ышанам. Төркиәләге хеҙмәттәштәребеҙ менән әүҙем эшләйбеҙ, унда беҙҙең вәкиллек бар. Тауар әйләнеше динамикаһына килгәндә, ул йылына яҡынса 20 процентҡа үҫә. Хәҙер беҙ төрөк партнерҙары менән ҙур производстволарҙы локалләштереү буйынса бер нисә проект әҙерләнек. Әлегә багажда эре төрөк инвестициялары бар тип әйтә алмайым, әммә тауар әйләнеше ҙур һәм ул йылдан-йыл арта. Урал аръяғы төбәге өсөн бизнес менән мөһим килешеүҙәргә килгәндә иһә, Башҡортостан Башлығы түбәндәгеләрҙе билдәләне: - Уларҙың бер өлөшө - ҡул ҡуйыу, бер өлөшө тормошҡа ашырыу стадияһында. Килешеүҙәрҙең күпселек өлөшө Урал тау-металлургия компанияһы менән үҙ-ара хеҙмәттәшлек итеүгә ҡағыла. Тимер юл инфраструктураһы ҙур проект булып тора. Беҙ техник-иҡтисади нигеҙләүгә аҡса әҙерләйбеҙ. Шулай уҡ хаҡы 4 миллиард һумлыҡ «Шифа» балалар ял үҙәге төҙөлә башланы. Ысынында иһә проекттар күп. Уларҙың бер өлөшө - туризм өлкәһендә: глэмпингтар, ял базалары. «Морат» курортының инвестициялар күләме буйынса проекты 6-8 миллиард һумға күтәрелгән. Әлеге ваҡытта ул бизнес-план төҙөү этабын үтә. Дөйөм алғанда, бөтәһе лә үҙ яйы менән бара һәм планлы рәүештә үҫешә, - тине Радий Фәрит улы. Фото: glavarb.ru