26 майҙа Сибайҙа Башҡортостан Башлығы Радий Хәбиров «Урал аръяғы» Бөтә Рәсәй инвестиция һабантуйының пленар ултырышында ҡатнашты. Сараның төп фекер алышыу темаһы - «Глобаль үҙгәрештәрҙә яңы үҫеш мөмкинлектәре». Форумда Рәсәйҙең 14 төбәгенән һәм һигеҙ сит илдән 3,5 мең кеше - власть һәм бизнес органдары вәкилдәре, эксперттар һәм йәмәғәт эшмәкәрҙәре, шулай уҡ инвесторҙар ҡатнаша. Ултырыштағы сығышында төбәк етәксеһе республика иҡтисадының санкция баҫымы шарттарында тотороҡло үҫешеүен билдәләне һәм инвестициялар йәлеп итеү өлкәһендә эштең төп бурыстарын билдәләне. Йүнәлештәрҙең береһе - яңы проекттарға ярҙам итеү өсөн ҡануниәт базаһын яңыртыу. Атап әйткәндә, проекттарға өҫтөнлөклө статус алыу һәм һалым преференциялары биреү өсөн инвестициялар күләме буйынса талаптарҙы кәметеү планлаштырыла. - Беҙ эшҡыуарлыҡҡа нимә ҡамасаулауын, инвестицияларҙы тотҡарлауын ентекле тикшерҙек. Һөҙөмтәлә инвестиция ҡануниәтен ярайһы ныҡ яңырттыҡ, - тип белдерҙе Радий Хәбиров. - Мин республика Хөкүмәтенә 2023 йылдың 1 июленән яңы, иркенерәк инвестиция ҡануниәте саралары эшләй башларға тейеш тигән бурыс йөкмәттем. Һүҙ өҫтөнлөклө инвестиция проекты статусын алыуҙың ябайлаштырылған ысулы һәм республика Башлығы ҡарары менән инвестиция эшмәкәрлеге өсөн ер алыу тураһында бара. Әйтергә кәрәк, Башҡортостан яңы инвестициялар йәлеп итеү буйынса юғары потенциалға эйә. Дүрт йыл рәттән төбәк иҡтисадына капитал һалыуҙар күләме арта. 2022 йыл йомғаҡтары буйынса ул 512,4 миллиард һумға еткән. - Был бик етди алға китеш. Ләкин беҙ юғары планкаға ынтылырға - республика иҡтисадына йылына 1 триллион һумға тиклем саралар йәлеп итергә тейешбеҙ. Беҙҙең менән хеҙмәттәшлек иткән бөтә компанияларға, эшҡыуарҙарға ҙур рәхмәт, - тине Радий Хәбиров. Республика төбәктең инвестициялар йәлеп итеүсәнлеген арттырыуҙы дауам итәсәк, тип өҫтәне Башҡортостан Башлығы. Пленар ултырышта Радий Хәбиров үҙенсәлекле проектты тормошҡа ашырыу хаҡында ла һөйләне. Һүҙ төбәк биләмәһендә белорус зубрҙарын үрсетеү хаҡында бара. Әле республикаға яңы күршеләр ҡайтарылған. Ултырыштың көн тәртибе сиктәрендә Рәсәй Сит ил эштәре министрлығының махсус йөкләмәләр буйынса илсеһе, Рәсәй-Африка партнерлыҡ форумы секретариаты етәксеһе Олег Озеров сәләмләү һүҙе менән сығыш яһаны. Уның фекеренсә, Көнбайыштың санкциялар сәйәсәте Рәсәйҙе үҫтереү мөмкинлектәрен сикләүгә йүнәлтелгән. - Шул уҡ ваҡытта Африканың күпселек илдәрендә Рәсәй менән үҙ-ара хеҙмәттәшлеккә ифрат ихтыяж ҙур, - тип хәбәр итте Олег Озеров. - Бөгөн союздаштарыбыҙ пулы формалаша, беҙ уның менән ең һыҙғанып эшләргә тейеш. Башҡортостанда халыҡ-ара хеҙмәттәшлекте үҫтереү өсөн ҙур потенциал булдырылған. Сит ил бизнесына тәҡдим итерлек нәмәләр байтаҡ. Иҫәп-хисап системаһын, логистиканы төҙөү һәм продукцияғыҙҙы тәҡдим итерлек майҙансыҡтар булдырыу мөһим, - тине Олег Озеров. Башҡортостан Хөкүмәте Премьер-министры Андрей Назаров Урал аръяғын социаль-иҡтисади йәһәттән үҫтереүҙең һуңғы дүрт йылдағы төп йомғаҡтары менән таныштырҙы. Мәҫәлән, ошо осорҙа иҡтисадҡа инвестициялар күләме 82 миллиард һумдан ашҡан. 200 яңы проект тормошҡа ашырылған. - Был биләмә күп параметрҙар буйынса уникаль булып тора. Хәҙерге шарттарҙа ла беҙ инвесторҙарҙың Урал аръяғы райондары менән ҡыҙыҡһыныуын күрәбеҙ, - тип һыҙыҡ өҫтөнә алды Андрей Назаров. - Шул уҡ ваҡытта инвестициялар һәм биләмәләр үҫешенең аныҡ һөҙөмтәләре араһында тигеҙлеккә ынтылырға тейешбеҙ. Һүҙ сәнәғәт һәм социаль объекттар төҙөү, үҫешкән инфраструктура, кешеләрҙең йәшәү сифатының юғары кимәле хаҡында бара, тип аңлатты премьер-министр. Ултырыш аҙағында иң яҡшы муниципалитеттарҙы - уңайлы эшлекле мөхит булдырыу буйынса эш һөҙөмтәлелеге рейтингы лидерҙарын наградлау тантанаһы үтте. Ауыл муниципаль берәмектәре категорияһында беренсе урынды Шаран, икенсене - Өфө, өсөнсөнө Стәрлебаш районы яуланы. Ауыл муниципаль берәмектәре категорияһында (уларҙың үҙәктәре ҡала биләмәләре) беренсе урынды Благовещен, икенсене - Туймазы, ә өсөнсөнө Мәләүез районы алды. Өфө ҡала округтары араһында алдынғылыҡты бирмәне, ә икенсе һәм өсөнсө урындарҙы Нефтекама һәм Сәтрлетамаҡ яуланы. Фото: glavarb.ru