Башҡортостанда яһалма интеллект технологиялары нигеҙендә йөрәк-ҡан тамырҙары ауырыуҙары менән көрәш «Йөрәк-ҡан тамырҙары ауырыуҙарына ҡаршы көрәш» төбәк программаһы сиктәрендә «Инсульттар мониторингы үҙәге» пилот проекты ярҙамында ғәмәлгә ашырыла. Республика дауаханаларынан мәғлүмәттәр Өфө ҡалаһының ашығыс ярҙам клиник дауаханаһына киләсәк, уның белгестәре яһалма интеллект ярҙамында дауалау алымын билдәләргә ярҙам итәсәк. Һаулыҡ һаҡлауҙа өҫтөнлөклө йүнәлештәрҙең береһе - инсультты тиҙ һәм теүәл асыҡларға ярҙам иткән методикаларҙы белгән табиптарҙың квалификацияһын күтәреү. Ошоға ярашлы Өфөләге Ашығыс медицина ярҙамы клиник дауаханаһы белгестәре (тиҙҙән уның базаһында яһалма интеллект файҙалана башлаясаҡ), нур диагностикаһы табиптары һәм Бөрө үҙәк район дауаханаһы неврологтары өсөн уҡытыу семинары үткәрҙе. Яҡын арала республикала ошондай бер нисә сара үткәреү планлаштырылған, был табиптарҙың квалификацияһын күтәреүгә һәм халыҡтың инсульттан үлем осраҡтарын кәметеүгә булышлыҡ итәсәк. Мәғлүм булыуынса, Рәсәй Президенты Владимир Путин тәҡдим иткән милли проекттар 2019 йылда тормошҡа ашырыла башланы. Беҙҙең республикала был йүнәлешкә ҙур иғтибар бирелә. "Һаулыҡ һаҡлау" милли проекты (национальный проект "Здравоохранение") нигеҙендә эшкә һәләтле йәштәге халыҡ араһында үлем осраҡтарын кәметеүгә, медицина учреждениеларының матди-техник базаһын, халыҡты медицина хеҙмәтләндереү шарттарын яҡшыртыуға йүнәлтелгән бик күп пландар һәм проекттар тормошҡа ашырыла, шул иҫәптән йөрәк-ҡан тамырҙары сирҙәрен дауалау буйынса ла. Фото: www.бсмп-уфа.рф