Гафури районының Ялгызкаен авылы илдә ике Советлар Союзы Герое – Закир Әсфәндияров белән Зәйнетдин Әхмәтҗановны үстергән уникаль авыллар исемлегенә керә. Авылдашлары Геройлар истәлеген кадерләп саклый, аларга куелган һәйкәлләрдән чәчәк өзелми, бу урынны һәрвакыт чистартып торалар. Геройлар авылының балалары да батыр һәм курку белмәс булып үсә. Илебезгә куркыныч янаганда алар бердәм булып ил сагына баскан – Ялгызкаен авыл биләмәсеннән дистәдән артык егет махсус хәрби операциядә катнаша. Күптән түгел алар бер-бер артлы ялда булып китте.Ә апрель ахырында авылда Миңнегали Шәйморатов исемендәге батальон әгъзалары катнашлыгында матур чара үтте. Район вәкилләре, район халкы белән очрашканнан соң, әлеге егетләр авылдагы Геройлар һәйкәленә чәчәкләр салды. Илдуска 51 яшь. Ул үзе теләп Миңнегали Шәйморатов исемендәге батальон әгъзасы булган. Әйткәндәй, аның картәтисе дә Бөек Ватан сугышы елларында Миңнегали Шәйморатов исемендәге дивизиядә сугышкан. Кызганычка каршы, туган иленә исән кайтырга язмаган аңа. Ә Илдус алты ай хезмәт иткәннән соң кайткан. Президент Владимир Путинның 50 яшьтән үткәннәрне өйләренә кайтарырга дигән ул вакыттагы указына ярашлы, аның контрактын туктатканнар. Срочный хезмәтне Илдус Рязаньда ВДВ сафларында үткән булган. Ә СВОда механик-водитель булып хезмәт иткән. Аның позывное – “Дед”. Батальонда иң өлкән яшьтәгеләрнең берсе булганга, шулай атап йөрткәннәр. Илдуска Донецкида республика Башлыгы Радий Хәбиров белән очрашырга да насыйп булган. Ул чакта төбәк җитәкчесе аны Шәйморатов ордены белән бүләкләгән. Әлбәттә, бик күп яугирләр кебек үк, Илдус барысын да сөйләп бармый, азсүзле. Ул кабат махсус операциягә бару турында сүз чыккач кына җанланып китте. Аның өчен ике төрле фикер була алмый: ул анда тагын барачак! Форсаттан файдаланып, Илдус махсус хәрби операциядә булганда ярдәм иткән якташларының барысына да рәхмәт белдерде. “Без бернинди дә кытлык кичермәдек, – ди ул. – Ашарга да, кияргә дә һәрвакыт булды. Моның бер сәбәбе – туган җирдән гуманитар конвойның даими килеп торуында. Шушы эштә катнашкан һәммә кешегә рәхмәт белдерәм”.Илдусның әнисе Рәмзия апа гәзитебезнең күптәнге дусты булып чыкты. Ул элегрәк “Кызыл таң”га еш язышып торды. Аның үзе турында да мәкаләбез басылды. Рәмзия апага 77 яшь инде. Ире белән алар биш бала тәрбияләп үстергән. Кызганычка каршы, олы уллары бик яшьли юл һәлакәтенә тарып үлгән. Уртанчысы – Илдус, тагы да ике кызлары һәм төпчек уллары бар. – Кече улым Илшатка Чечня гарасатын үтәргә туры килде, – ди ул. – Аннан кайткач та сугыш авазы бик озак тынгылык бирмәде безгә. Илшат, төннәрен сикереп торып: “Әнә, аталар...” дип чыгып йөгерә иде. Аны эзләп алып кайта идек. Төннәрен улымны саклап үткәрдем. Инде шөкер, савыкты. Өйләнде, өч бала үстерә.Типсә тимер өзерлек баһадир гәүдәле, ачык йөзле Илдус моңа кадәр вахта ысулы белән эшләп йөргән. Ләкин шушы хәлләр башлангач, түзеп тора алмаган. Әле дә йөрәге шунда ашкына. “Туган илем өчен җан атам. Аны яклыйсым, саклыйсым килә. Без булмасак, кем соң?” – ди Илдус. Теләген тормышка ашырыр ул. Ниятеннән ваз кичә торганнардан түгел. Батыр ир-егеткә сугыш кырларыннан исән-имин әйләнеп кайтырга язсын берүк. Автор фотосы.