“Егет кешегә файҙаға ғына”

Армияла булған егеттәр хаҡында элек-электән “донъя күреп ҡайтҡан, сыныҡҡан, абруйлы шәхестәр” тиҙәр. Ишембай районының Алаҡай ауылында йәшәгән Михаил Скорняков та бала сағынан “хәрби хеҙмәткә барам” тигән маҡсат менән үҫә, 18 йәше тулыу менән армияға китә. – 1984 йылдың 7 нояб­рендә хәрби хеҙмәткә саҡырылдым. Эстониялағы Таллиннда сик буйы ғәс­кәрҙәре отрядында хеҙмәт иттем. Уҡыу курсын үткәндән һуң, Прангли утрауына эләктем. 2-се сик буйы застава­һында “Кредо” ер өҫтө разведкаһы станция­һы командиры сифатында хеҙмәт иттем. Был утрау Финляндияның Хельсинки ҡалаһынан 44 километр ғына алыҫлыҡта. Маҡсат илебеҙ сиген тәртип боҙоу­сыларҙан һаҡлау ине һәм был бурысты намыҫ менән үтәнем, – тип һөйләп алып китте әңгә­мәсем йәш саҡтарын иҫкә төшөрөп. Өлгөлө хеҙмәте өсөн Ватан һаҡсыһының күкрәген I һәм II дәрәжә “Сик буйы ғәскәрҙәре отличнигы” бил­дәләре биҙәй. Сержант хәрби исемендә тамамлай ул үҙенең ил алдындағы бурысын. – Элек армияға бармау егет өсөн хурлыҡ һанала торғайны. Олатайым да әрмелә булды. Атайым Һарытау өлкәһендә старшина булараҡ хеҙмәт итте. Шуға мин дә үҙемде армияға алдан әҙерләнем. Улдарыма өлгө булырға тырыштым. Әле өлкән улым да, хеҙ­мәттән ҡайтып, махсус хәрби операцияға контракт буйынса барырға ниәтләнә, – тине ул. Михаил Борисович сик буйы һаҡсылары көнөн айырыуса көтөп ала. Быйыл Рәсәйҙең Сик буйы ғәс­кәрҙәренә 105 йыл тула, был уның өсөн айырыуса иҫтәлекле ваҡиға. – Ғәҙәттә, ошо көндә дуҫтар, хеҙмәттәштәр менән осрашабыҙ. Элек Салауат ҡалаһында йәшәгәс, ундағы Мәңгелек ут янына киләбеҙ. Беҙҙең аранан мәңгелеккә киткән егеттәрҙең ҡәберҙә­ренә барып, уларҙы ла иҫкә алабыҙ. Сик буйы һаҡсыһы булыу – минең өсөн ҙур ғорурлыҡ. Байрам көнөндә ҡала буйлап атлағанда ла башҡаларҙың һоҡланыулы ҡарашын тоям, ҡотлауҙарын ҡабул итәм. Хеҙмәттәш­тәремде етеп килгән байрам менән ҡотлайым, барыһына ла һаулыҡ теләйем, – тигән изге теләктәрен дә еткерҙе әңгәмәсем. Элек Салауат ҡалаһында йәшәһә лә, ваҡыт үтеү менән күңеле тыуған ауылына тартыла. Бөгөн Михаил Скорняков өләсәһе­нең нигеҙен һыуытмай ғүмер итә. Уның йәш быуынға әйтер теләк­тәре лә бар: – Армиянан ҡурҡырға кәрәкмәй. Егет кешегә ул файҙаға ғына. Унан үҫмерҙәр ысын ир-ат булып ҡайта, – тине Михаил Борисович. Борон-борондан ирҙәр ил терәге булған. Тыуған ер өсөн ауыр мәлдәрҙә лә тап көслө заттар уны һаҡлау өсөн хәрби сафҡа баҫа. - Резеда ШӘҢГӘРӘЕВА Ишембай районы