Мәшһүр тренерҙың ейән-ейәнсәрҙәре лә килде

Дәүләкән ҡалаһындағы физкультура-һауыҡтырыу комплексында 2012–2014 йылғы йәш үҫмерҙәр араһында самбо көрәше буйынса республика турниры ойошторолдо. Был сараны дәүләкәндәр арҙаҡлы яҡташтары – Рәсәйҙең атҡаҙанған тренеры, Дәүләкән ҡалаһында самбо менән дзюдоға нигеҙ һалған Валерий Терентьевтың яҡты иҫтәлегенә арнаны. Дәүләкән районы хакимиәтенең матбуғат хеҙмәте хәбәр итеүенсә, Валерий Васильевичтың ейән-ейәнсәр­ҙәре лә сарала ҡатнашҡан, сөнки тап уларҙың олатаһы был төбәктә 1985 йылда “көрәш мәҙәниәте”н булдырған. 47 йыл эсендә “Самбо-75” спорт мәктәбе Европа, донъя турнирҙарын­да 11 чемпион һәм самбо, дзюдо һәм көрәш буйынса призер әҙерләгән. Тағы 30-ҙан ашыу спортсы Бөтә Союз беренселектәрендә еңеүсе тип танылған һәм алдынғы урындарға сыҡҡан. Әйткәндәй, заманында Дәүләкән йыйылма командаһы ике тапҡыр СССР беренселегендә, СССР Олимпия комитетының хәрби-илһөйәрлек клубтары араһында үткәрелгән ярыштарҙа өсөнсө урынды яулаған. Дәүләкән ҡалаһында ойошторолған сираттағы ярыштарҙа Белорет, Межгорье, Октябрьский, Өфө, Стәрле­тамаҡ, Ишембай, Дәүләкән, Бәләбәй ҡалаларынан, Ергән ҡасабаһынан спортсылар үҙ көсөн һынаны. Дәүләкән спортсылары Ислам Ҡорманаев22 килограмға тиклемге ауырлыҡ үлсәмендә – икенсе, Матвей Медведев (31), Егор Рамаев (35), Әмир Акулов (38) – өсөнсө, Матвей Генералов – беренсе (38), Арыҫлан Әпсәләмов (42), Максим Тажетдинов (46), Илья Булатов, Данияр Шафиҡов (50), Матвей Филимонов (55) – өсөнсө, Арыҫлан Хәлфиев – беренсе (60), Егор Степанов 60 килограмға тиклемге ауырлыҡ үлсәмендә икенсе урын яулаған. Уларҙың тренерҙары – И.Х. Яҡу­пов, Р.Р. Исламов, Ю.Б. Лоншаков. Айһылыу НИЗАМОВА