Бала саҡ хыялы алға әйҙәгән

Ишембай үҙәк район дауаханаһының неврология бүлеген етәкләгән Руфина Вәлиеваны төбәк халҡы үҙ эшен яратып башҡарған, бар күңеле менән һөнәренә бирелгән табип булараҡ белә. Бала саҡ хыялын тормошҡа ашырып, ҙур ныҡышмалылыҡ һәм тырышлыҡ күрһәтеп белем алған, кешеләргә ярҙам итеүҙән йәм тапҡан, ипле холоҡло, яғымлы хеҙмәткәрҙе коллегалары ла хөрмәт итә. Руфина Ғәзинур ҡыҙы Ишембай ҡалаһын­да тыуып үҫә, ошондағы 3-сө урта мәктәптә белем ала. Аҡ халат кейеп, кешеләрҙе дауалау хыялын тормошҡа ашырыу маҡса­тында бер нисә тапҡыр медицина университетына инеп ҡарай, әммә конкурстан үтә алмай. Ҡаршылыҡтар алдында баҙап ҡалмаған тырыш ҡыҙ ваҡытты бушҡа үткәрмәү өсөн Стәрлетамаҡ медицина колледжында стоматология буйынса уҡый. Ниһайәт, 2005 йылда маҡсатына өлгәшә – Пермь дәүләт медицина академияһына уҡырға инә. Артабан Өфөлә неврология буйынса интернатура үтеп, 2012 йылда тыуған төйәгенә – Ишембай дауаханаһына эшкә ҡайта. 2015 йылда тырыш, белемгә ынтылышлы табипты неврология бүлеге мөдире итеп тәғәйенләйҙәр. “Ни өсөн неврология йүнәлешен һайла­нығыҙ?” тигән һорауға Руфина Ғәзинур ҡыҙы: “Миңә һәр ваҡыт билдәһеҙ ғәмәлдәрҙе өйрәнеү, яңылыҡҡа ынтылыу, һөҙөмтәгә өлгәшеү оҡшай. Мәҫәлән, инсульт кисергән пациенттарҙы дауалағанда уларҙың аяҡҡа баҫыуын, дауалауҙың ыңғай һөҙөмтә биреүен күреп, үҙең дә шатланаһың”, – тип яуапланы. Белгес менән неврология сирҙәренең күбәйеү сәбәптәре, уларҙы иҫкәртеү алымдары тураһында ла әңгәмәләштек. – Барлыҡ сирҙәр – нервынан, тип тиккә әйтмәйҙәр. Үҙ организмыңа иғтибарлы булырға, табипҡа мөрәжәғәт итергә кәрәк. Остеохондроз, баш ауыртыуға зарланыусылар күп. Компьютер янында оҙаҡ ултырыу, хәрәкәт етешмәүе лә ошоларға сәбәпсе була, шуға күрә кәүҙә ауырлығын, ҡан баҫымын даими контролдә тоторға, физик йәһәттән әүҙем тормош алып барырға кәрәк, – ти Руфина Ғәзинур ҡыҙы. Неврология бүлегендә дауаланған пациенттар менән аралашыу барышында уларҙың барыһы ла мөдирҙең, шәфҡәт туташтарының, башҡа хеҙмәткәрҙәрҙең эшенән ҡәнәғәт булыуы тураһында белдерҙе, ихлас рәхмәт һүҙҙәре әйтте. Аҡ халатлы белгестәр өсөн иң ҙур бүләк тап ошолор. Руфина Ғәзинур ҡыҙының ғаиләһе лә бына тигән. Тормош юлдашы нефть сәнәғәте тармағында эшләй. Уларҙың татыу ғаиләһендә ул һәм ҡыҙ үҫә. Тиҙҙән тағы бер бәпескә атай һәм әсәй булырға йыйыналар. Ишембай халҡының һаулығы хаҡына ихлас хеҙмәт иткән, үҙ һөнәрен яратып башҡарған Руфина Вәлиеваға һәр йәһәттән уңыштар, ғаилә бәхете теләйбеҙ. Таисия КОНДАЛОВА, неврология бүлегендә дауаланыусы: – Дауаханаға бик ауыр хәлдә эләктем. Руфина Ғәзинур ҡыҙы етәксе­легендәге бүлек хеҙмәт­кәрҙәре мине аяҡҡа баҫтырыу өсөн көсөн дә, ваҡытын да йәлләмәне. Коллектив шул тиклем берҙәм, татыу, һәр кем үҙ эшен белеп башҡара, ә мөдир Руфина Вәлиева – үҙ һөнәренең ысын оҫтаһы. Ул мотлаҡ табип булырға тейеш булғандыр, тип уйлайым. Изге күңелле, йомшаҡ һүҙле, белемле. Тап уның ҡулында дауаланыуыма шатмын. Руфина Ғәзинур ҡыҙына, бү­лексә хеҙмәт­кәрҙәренә ихлас рәхмәтемде еткерәм, беҙгә ҡылған изгелектәре үҙҙәренә йөҙләтә әйләнеп ҡайтһын! - Гөлдәр ЯҠШЫҒОЛОВА Ишембай ҡалаһы