Был һары сәскәнең кеше һаулығына шифаһы тураһында һуңғы ваҡытта күп яҙалар. Әммә ни тиклем файҙалы булмаһын, баҡсала уға урын юҡ. Нимәгәме? Был хаҡта Рәсәй ауыл хужалығы үҙәгенең Башҡортостан буйынса филиалы агрономы Айһылыу Камалетдинова һөйләй. – Тәү сиратта был үҫемлек бик әрһеҙ: тамырының бер өлөшө генә тороп ҡалһа ла, ул яңынан үҫеп сығасаҡ. Икенсенән, башҡа сүп үләндәре кеүек үк, баҡса культураларына үҫергә ирек бирмәй. Уның тәрәнгә киткән тамыры башҡа үҫемлектәргә көс йыйырға һәм үҫергә ҡамасаулай. Әгәр ул таралмаһын тиһәгеҙ, ихатала үҫкәнен сәскә атҡанға тиклем сабығыҙ. Бәпембәне баҡсала бөтөнләй бөтөрөүҙең иң ышаныслы ысулы – уны тамыры менән өҙөп ташлау. Бының өсөн көрәк йәки баҡса магазиндарында һатылған махсус бәләкәй көрәк кәрәк буласаҡ. Бәпембә ихатала ныҡ таралһа, гербицидтар ҡулланмай мөмкин түгел. Дарыу алған мәлдә уның ҡулланмаһында мотлаҡ шәхси ихаталарҙы эшкәртеүгә яраҡлы тип яҙылғанын алығыҙ, – ти ул. Лилиә НУРЕТДИНОВА