Ҡара диңгеҙгә лә етерҙәр

Һуңғы дүрт йыл эсендә республика ярҙамы һәм федераль программаларҙа ҡатнашыу арҡаһында “Башавтотранс”тың автопаркы 1050 автобусҡа тулыланған. Был турала Хөкүмәттең аҙналыҡ кәңәшмәһендә предприятиеның генераль директоры Надир Самиев һөйләне. Күсмә составты яңыртыу – республика ташыусыһы үҫешенең мөһим йүнәлешенең береһе. Ул Рәсәйҙең транспорт предприятиелары араһында алдынғы бишәүгә инә. 2022 йылда 105 НефАЗ һәм ике туристик лайнер, быйыл тағы 30 берәмек Ҡытайҙа етештерелгән техника алғандар. “Башавтотранс” техник паркын үҫтереп Ҡара диңгеҙ курорттарына маршруттар асырға ниәтләй. Бындай ғаризаны компания илдең Транспорт министрлығына ебәргән дә. Республика етәксеһе төбәктең ауыл автобустарын яңыртыу буйынса федераль программала ҡатнашыуын контролгә алырға ҡушты. Республиканың транспорт һәм юл хужалығы министры Александр Клебанов, июль аҙағында бәләкәй ҡалаларға һәм ауылдарға яңы 250 автобустың тәүге партиялары килә башлаясаҡ,тине. – Беҙ заявка кампанияһын уңышлы үткәрҙек һәм ауылға автобустар алыу өсөн күп кенә аҡса алдыҡ. Өфө автопаркын яңыртып бөткәс, ошондай уҡ эште бәләкәй ҡалаларҙа ла башҡарасаҡбыҙ, – тине Радий Хәбиров. Надир Самиев белдереүенсә, “Алға” транспорт картаһы ла һәйбәт динамика күрһәтә. Көн һайын уның менән 177 мең пассажир иҫәпләшә. Ә ҡулаҡсаһыҙ иҫәпләшеүҙең дөйөм өлөшө 2023 йылдың беренсе кварталында 87 процентҡа еткән. Радий Хәбиров коллективҡа яҡшы эше өсөн рәхмәт әйтте һәм алдынғы водителдәргә наградалар бирергә ҡушты. – Махсус хәрби операция зонаһына күп тапҡырҙар барған водителдәрҙе наградаға тәҡдим итегеҙ. Унда юлдар ябай түгел, әммә транспорт сәғәт кеүек эшләй. Һәм подразделениелар командирҙары бының өсөн рәхмәтле, – тине Радий Хәбиров. Ул шулай уҡ водителдәр өсөн дөйөм ятаҡты төҙөп бөтөргә кәрәк тине. Ремонт эштәре тамамланғас, унда үҙе барасаҡ. Шулай уҡ компанияға республика автовокзалдарын яңыртыу программаһын эшләргә ҡушты. Фото: Башҡортостан Башлығы сайты.