Рузана Мөлкамалова һыбай йөрөп, “Ватан” ауыл хужалығы етештереү кооперативының баҫыуҙарын ҡарауыллай. Күптәр уның һөнәрен “сәйер” тип иҫәпләр, тик Рузана был фекер менән килешмәй. Аттарҙы ул бәләкәй саҡтан ярата, тип яҙа “Көйөргәҙе” гәзите. “Беҙ Ҡаҙағстанда йәшәнек, күршеләр йылҡы тотто. Мин дә был аҡыллы хайуандар менән яҡындан дуҫлаштым. Өсөнсө класта уҡығанда, ғаиләбеҙ менән Көйөргәҙе районындағы Холодный Ключ ауылына күсеп килдек. Ветеринарға уҡып сыҡтым, аҙаҡ “Ватан” ауыл хужалығы етештереү кооперативына эшкә урынлаштым. Ҡымыҙ бештем, бейә бәйләнем.Ҡымыҙ цехы ябылғас, йылҡы фермаһына эшкә күсерҙеләр. Ауырлыҡтар мине ҡурҡытмай, аттар менән эшләргә яратам”, – ти ул. Юртаҡ аттарҙы ғына түгел, ”тимер ат”тарҙы йүгәнләргә лә оҫта ул, яҙғы сәсеү ваҡытында үҙенең “уазигында” комбайнерҙарға орлоҡ ташыған. Малдарҙы тәрбиәләү менән бергә Гром ҡушаматлы атында кооператив баҫыуҙарын ҡарауылларға сыға. Предприятие рәйесе Ғәйнетдин Мөхәмәтов әйтеүенсә, Рузана ҡаты характерлы, тура һүҙле, үҙ эшен яратып башҡарған ҡыҙ. “Мин ундай кешеләрҙе хөрмәт итәм һәм баһалайым”, - ти етәксе. Фото: Көйөргәҙе мәғлүмәт үҙәге.