Көндәрҙең ныҡ эҫе тороуы күптәрҙе борсоуға һалмай ҡалмайҙыр. Бигерәк тә ҡан баҫымы менән интегеүселәргә бындай көндәрҙә ауырға тура килә. Хатта үҙен һау-сәләмәт итеп тойған кеше лә тирләүҙән яфалана. Табиптар фекеренсә, тир бүленеүе – организмдың мөһим функцияһы. Уның ярҙамында һыуынабыҙ, һыу-тоҙ балансы көйләнә, токсиндар сығарыла. Тир, күҙҙәрҙәге керпектәр кеүек, бер үк функцияны башҡара – тире эсенә микробтар эләкмәһен өсөн тәндә һаҡлағыс ҡабыҡ барлыҡҡа килтерә. Әсе тир еҫе сығып, кешеләрҙең кәйефен боҙмаҫ өсөн, дөрөҫ туҡланырға кәрәк, тип иҫәпләй табиптар. Эҫелә ҡәһүәне, татлы аҙыҡ-түлекте аҙыраҡ ҡулланырға, газлы эсемлектәр, тәмәке, алкоголь, әсе ризыҡтар менән мауыҡмаҫҡа кәңәш бирәләр. Нисек туҡланыуыбыҙға ҡарап, беҙҙән шундай еҫ аңҡыясаҡ. Табиптар йәшелсә, емеш-еләк, йәшел тәмләткестәрҙе күберәк файҙаланырға ҡуша. Эҫелә иң яҡшыһы – тәбиғи эсемлектәр. Һыу, кеүәҫ, лимонлы сәй, еләктән яһалған морстар һыуһынды ҡандыра. Артыҡ ныҡ тирләйһегеҙ икән, бер ниндәй дезодорант та һеҙгә ярҙам итмәҫ.Тиргә батыуҙың сәбәбен бары табип ҡына асыҡлай ала. Уның эндокрин, нервы системалары сирҙәре, шәкәр диабеты билдәһе булыуы ихтимал. Йәйге селләлә синтетик туҡыманан тегелгән кейем кеймәҫкә тырышығыҙ, сөнки ул тиҙ һыулана һәм насар еҫле. Иң яҡшыһы – кизе-мамыҡ туҡыманан тегелгән кейем, ул дымды һеңдерә, тән тиреһе ҡоро килеш ҡала, һәйбәт елләй. Тирҙән ҡотолоу өсөн гигиена талаптарын үтәү мөһим. Иртәле-кисле душта ҡойоноу файҙалы, тәнегеҙгә төрлө сабыртмалар сыҡмаҫ. Оло йәштәгеләргә эҫе ваҡытта өйҙә ултырырға кәңәш ителә. Әгәр урамға сыҡһағыҙ, мотлаҡ башығыҙға яулыҡ йәиһә эшләпә кейегеҙ, үҙегеҙ менән һыу алып йөрөгөҙ. Фото: altai.aif.ru һәм rgo.ru