Рәсәй Федерацияһының Тәбиғәт ресурстары һәм экология министрлығы “Экология” милли проектының “Үҙенсәлекле һыу объекттарын һаҡлап ҡалыу” федераль проектын тормошҡа ашыра. Федераль проект сиктәрендә һыу объекттарының ярҙарын сүп-сарҙан таҙартыу буйынса саралар – “Рәсәй һыуы” бөтә Рәсәй акцияһы уҙғарыла. Ул ил халҡы араһында экологик грамоталылыҡты арттырыуға булышлыҡ итә, шул иҫәптән һыу ресурстарының сифатын һаҡлауға һәм яҡшыртыуға йәмәғәтселектең иғтибарын йәлеп итә. Акция Рәсәйҙә иң ҙур экологик башланғыстарҙың береһе тип танылды. Туғыҙ йыл эсендә акция Калининградтан алып Владивостокка тиклем 8 миллион ирекмәнде берләштерҙе, улар 75 меңләп камаз сүп-сар йыйҙы. 2022 йылда ғына 22 мең сара уҙғарылған, уларҙа 1,3 миллион кеше ҡатнашҡан. Акцияны ҙур мәғлүмәт партнерҙары, шул иҫәптән “Комсомольская правда”, Рус медиатөркөмө, ТАСС, Бөтә Рәсәй дәүләт телерадиотапшырыуҙар компанияһы һ.б. яҡтырта. Йыл һайын федераль һәм төбәк киң мәғлүмәт сараларында акция тураһында 11,5 мең самаһы мәҡәлә баҫыла. Башҡортостан акцияла әүҙем ҡатнаша һәм ҡатнашыусы төбәктәр рейтингында тәүге бишәү иҫәбенә инә. 2019-2022 йылдар йомғаҡтары буйынса республика биләмәһендә саралар ойошторолоп, унда 176 меңдән ашыу кеше ҡатнашты. 2023 йылда акция сиктәрендә мөһим саралар уҙа. Уларҙың береһе 4 июндә Эколог көнөнә төбәк-ара марафон форматында планлаштырылған. Сара бер үк ваҡытта Башҡортостан, Татарстан республикаларында, Удмуртия һәм Пермь крайында үтәсәк. Төп майҙансыҡ итеп Башҡортостан Республикаһы һайланған. Сара программаһында почетлы ҡунаҡтарҙың сығышы менән тантаналы асыу, сүп-сарҙы айырып йыйыу технологияһын ҡулланып, һыу объекты ярын йыйыштырыу, мәҙәни программа ҡаралған. Акция 2023 йылдың 4 июнендә 11:00 сәғәттә Өфө ҡалаһы, Затон биҫтәһе, “Водник” стадионы эргәһендә Ағиҙел йылғаһы ярында үтәсәк (Пожарский урамы, 47, 1-се корпус). Фото: берегдобрыхдел.рф