“Китап-бәйрәм” дип исемләнгән мәртәбәле киңкүләм чара башкаланың Совет мәйданында һәм аның тирәсендәге территорияләрдә Совет һәм Пушкин урамнары буйлап узачак. Ярминкә үткән мәйданда чатырлар урнаштырылачак, вакыйгалар мәйданчыклары, лекторийлар зоналары булдырылачак.Май башына эре нәшриятлардан, сәүдә оешмаларыннан һәм букинистлардан катнашу өчен 73 гариза килгән. Уфага шулай ук язучылар һәм шагыйрьләр, танылган театр артистлары, Русия төбәкләреннән һәм якын чит илләрдән музыкантлар чакырылган. – Безнең бурыч – чараны барлык яшь төркемнәре өчен кызыклы һәм бай итү. Көн саен программаны китап авторлары һәм кунакларыбыз белән очрашу форматында “Мөһим сөйләшүләр” ачачак. Без Русия Президенты ярдәмчесе Владимир Мединский, язучылар Михаил Лабковский һәм Татьяна Устинова, Вахтангов исемендәге дәүләт академия театры директоры Кирилл Кроктан раслау алдык инде, – дип билгеләде республиканың мәдәният министры Әминә Шәфыйкова. Фестивальнең кичке программасы үз эченә моноспектакльләрне һәм артистлар Даниил Спиваковский, Дмитрий Дюжев, Дарья Мороз башкаруында әсәрләрне сәнгатьле укуны алачак. Ярминкәдә Русия һәм башкорт әдәбиятының классик әсәрләре буенча нәфис фильмнар күрсәтеләчәк. Шулай ук фестиваль кысаларында конкурслар, хәйрия акцияләре, сирәк китаплар күргәзмәләре узачак. Оештыручылар көн саен 10 меңгә кадәр кунак көтә. – Халыкара ярминкәдә китапны пропагандалау – бик якты чара. Балаларыбыз күп укый. Бу юнәлешне алга таба да үстерергә кирәк, – диде Башкортстан Башлыгы Радий Хәбиров оператив киңәшмәләрнең берсендә. – Без, фестивальне уңышлы уздырып, аны республикабызның һәм Русиянең иҗтимагый һәм мәдәни тормышында чагу вакыйгага әверелдерергә тиеш!“Библиотөн” 27 майда узачак. Акция 18:00 сәгатьтә Зәки Вәлиди исемендәге Милли китапханәдә һәм аның алдындагы мәйданда оештырыла. Уеннар, квестлар, викториналар, балалар һәм өлкәннәр өчен конкурслар белән интерактив зоналар эшләячәк. Программада Альбина Исхакова башкаруында әкиятләр, башкорт әкиятләре буенча “Светлячок” курчак театры һәм “ПросТранство” лабораториясе спектакльләре һәм башка чаралар каралган. Кунакларны осталык дәресләре һәм лекцияләр, шулай ук кулъязмалар һәм комикслар күргәзмәләре, Башкортстан, Русия һәм чит ил авторларының китапларын, шул исәптән тактиль басмалар сату, балалар укуы буенча консультацияләр, экскурсия һәм башка күп чаралар көтә. Башкортстанның Матбугат һәм киңкүләм мәгълүмат чаралары агентлыгы Уфа хосписы белән берлектә “Китап-бәйрәм” ярминкәсе кысаларында “Уфа хосписының өй китапханәсе” китап киштәсен урнаштырачак. Акциянең максаты – балалар һәм өлкәннәр өчен җылы һәм рухи басмаларны паллиатив пациентлар белән уртаклашу.– Без “Китап” нәшриятының китапларын җыйдык инде, алар нәфис, тарихи, танып-белү темаларына багышлана, аларны хосписның өй китапханәсе өчен бүләк итәргә әзербез, – ди Матбугат һәм киңкүләм мәгълүмат чаралары агентлыгы җитәкчесе Максим Ульчев. Уфа хосписы директоры Радмила Сурначева сүзләренчә, мондый китапханәләр Русиянең күп кенә хосписларында эшли.Паллиатив пациентлар өчен өй китапханәсе булу – матур башлангыч. Башкортстанның Матбугат һәм киңкүләм мәгълүмат чаралары агентлыгы җитәкчесе урынбасары Марат Газизов аңлатуынча, Уфа хосписының булачак китапханәсе фондын тулыландыруда катнашырга теләгән һәркем үз өлешен кертә ала. Моның өчен “Уфа хосписының өй китапханәсе” киштәсен табып, анда үзеңнең китап-бүләгеңне калдыру да җитә. “Уфа хосписының өй китапханәсе” Совет мәйданында урнашачак.