Дәүләкән районы хакимиәтенән хәбәр итеүҙәренсә, Рәсәй Президенты Владимир Путиндың май указы менән раҫланған “Демография” милли проетының (национальный проект “Демография”) “Өлкән быуын” федераль проектына ярашлы, райондағы өлкән быуын вәкилдәре өсөн “Күп йөҙлө Өфө” тип аталған экскурсия ойошторолдо. Улар Өфө лимонарийына барҙы, Рус драма театрында “Зәңгәр камея” спектаклен ҡараны. Экскурсия баш ҡалаға нигеҙ һалынған ерҙән, Өфө Кремленән башланды. Хәҙер унда Башҡортостандың үҙ ирке менән Рус дәүләтенә ҡушылыуына 400 йыл тулыуға арналған Дуҫлыҡ монументы тора. Артабан ҡунаҡтар Рәсәйҙәге иң ҙур атлы скульптураны тәшкил иткән Салауат Юлаев һәйкәленә юлланды. Өфө лимонарийы өлкәндәрҙе үҙенсәлекле декоратив ағастары, ҡыуаҡлыҡтары һәм тропик сәскәләре менән таныштырҙы. Бай йөкмәткеле сәфәр сағыу тамаша – “Зәңгәр камея” спектакле менән тамамланды. Фото: contenta.info Сығанаҡ: https://contenta.info/press_releases/475364#scroll