“Мирас”тан — җиңү белән!

Бәйге ел саен Русия Федерациясенең Мәдәният министрлыгы, Самара өлкәсе­нең Мәдәният, Мәгариф һәм фән министрлыклары, Халыклар дуслыгы йорты, шәһәр хакимиятенең мәгариф департаменты, Татарстанның Мәдәният министрлыгы, Бөтен­дөнья татар конгрессы ярдәме белән уза.Быел бәйге “Татар халкының мәдәни мирасын саклыйбыз” шигаре астында “Педагог һәм остаз елы”на багышлап уздырылды. Конкурсантларның бер өлеше турыдан-туры катнашса, килә алмаучыларга үз материалларын видеоязмада тәкъдим итү мөмкинлеге дә булды. Көндезге форматтагы номерлар 161гә җитсә, читтән торып — 110, декоратив-сәнгать номинациясендә 60 эш каралды. Катнашучылар вокал, нәфис сүз, бию, инструменталь башкару, декоратив сәнгать номинацияләре буенча көч сынашты. Конкурста Самара, Татарстан, Башкортстан, Чуашия, Пенза, Ырынбур, Ульяновск, Краснодардан һәм Швеция, Чехия, Канада, АКШ, Казахстан, Үзбәкстаннан — барлыгы 500 катнашучы булды. Күләмле чара Самара шәһәренең “Чайка” мәдәният йортында узды.Фестиваль Самарада 2017 елдан бирле үткәрелә һәм 20 ел дәвамында уздырылган “Татар балалары җырлый” фестивален алыштырды.Фестиваль балаларның татар халкының әдәби, мәдәни-тарихи мирасы белән кызыксынуын арттыру, халкыбызның мәдәниятен һәм традицияләрен саклауга ярдәм итү, күпмилләтле җәмгыятьтә тынычлык һәм татулыкны пропагандалау, талантлы башкаручыларны алга таба үстерү, аларның талантын һәм башкару осталыгын күтәрү максатын күз уңында тота.Талантлы катнашучыларны Халыкара хезмәттәшлек программаларына җәлеп итү, иҗади элемтәләр урнаштыру, балалар һәм яшьләр арасында дуслык мөнәсәбәтләрен ныгыту һәм дәртләндерү дә зур әһәмияткә ия.Быел фестиваль-конкурста Башкортстаннан ике иҗади коллектив катнашты. Уфа районы Нижегородка бистәсенең Хәдичә Богданова җитәкчелегендәге “Чулпан” балалар халык бию ансамбле һәм шагыйрь-композитор Мидхәт Әбделманов җитәкчелегендәге “Милли аваз” халык вокаль ансамбле чыгыш ясадылар. “Чулпан” ансамбле икенче урынга лаек булса, “Милли аваз” беренчелекне яулады.Рузил ИМАМОВ.Уфа шәһәре.